Allepo, Zephaniah, Chapter 03

Zep 3:1 א הוי מראה ונגאלה--העיר היונה
Zep 3:2 ב לא שמעה בקול לא לקחה מוסר ביהוה לא בטחה אל אלהיה לא קרבה
Zep 3:3 ג שריה בקרבה אריות שאגים שפטיה זאבי ערב לא גרמו לבקר
Zep 3:4 ד נביאיה פחזים אנשי בגדות כהניה חללו קדש חמסו תורה
Zep 3:5 ה יהוה צדיק בקרבה לא יעשה עולה בבקר בבקר משפטו יתן לאור לא נעדר ולא יודע עול בשת
Zep 3:6 ו הכרתי גוים נשמו פנותם--החרבתי חוצותם מבלי עובר נצדו עריהם מבלי איש מאין יושב
Zep 3:7 ז אמרתי אך תיראי אותי תקחי מוסר ולא יכרת מעונה כל אשר פקדתי עליה אכן השכימו השחיתו כל עלילותם
Zep 3:8 ח לכן חכו לי נאם יהוה ליום קומי לעד  כי משפטי לאסף גוים לקבצי ממלכות לשפך עליהם זעמי כל חרון אפי--כי באש קנאתי תאכל כל הארץ
Zep 3:9 ט כי אז אהפך אל עמים שפה ברורה לקרא כלם בשם יהוה לעבדו שכם אחד
Zep 3:10 י מעבר לנהרי כוש--עתרי בת פוצי יובלון מנחתי
Zep 3:11 יא ביום ההוא לא תבושי מכל עלילתיך אשר פשעת בי  כי אז אסיר מקרבך עליזי גאותך ולא תוספי לגבהה עוד בהר קדשי
Zep 3:12 יב והשארתי בקרבך עם עני ודל וחסו בשם יהוה
Zep 3:13 יג שארית ישראל לא יעשו עולה ולא ידברו כזב ולא ימצא בפיהם לשון תרמית  כי המה ירעו ורבצו ואין מחריד  {פ}
Zep 3:14 יד רני בת ציון--הריעו ישראל שמחי ועלזי בכל לב בת ירושלם
Zep 3:15 טו הסיר יהוה משפטיך פנה איבך מלך ישראל יהוה בקרבך לא תיראי רע עוד  {פ}
Zep 3:16 טז ביום ההוא יאמר לירושלם אל תיראי  ציון אל ירפו ידיך
Zep 3:17 יז יהוה אלהיך בקרבך גבור יושיע ישיש עליך בשמחה יחריש באהבתו--יגיל עליך ברנה
Zep 3:18 יח נוגי ממועד אספתי ממך היו--משאת עליה חרפה
Zep 3:19 יט הנני עשה את כל מעניך בעת ההיא והושעתי את הצלעה והנדחה אקבץ ושמתים לתהלה ולשם בכל הארץ בשתם
Zep 3:20 כ בעת ההיא אביא אתכם ובעת קבצי אתכם  כי אתן אתכם לשם ולתהלה בכל עמי הארץ בשובי את שבותיכם לעיניכם אמר יהוה  {ש}