Allepo, Genesis, Chapter 38

Gen 38:1 א ויהי בעת ההוא וירד יהודה מאת אחיו ויט עד איש עדלמי ושמו חירה
Gen 38:2 ב וירא שם יהודה בת איש כנעני ושמו שוע ויקחה ויבא אליה
Gen 38:3 ג ותהר ותלד בן ויקרא את שמו ער
Gen 38:4 ד ותהר עוד ותלד בן ותקרא את שמו אונן
Gen 38:5 ה ותסף עוד ותלד בן ותקרא את שמו שלה והיה בכזיב בלדתה אתו
Gen 38:6 ו ויקח יהודה אשה לער בכורו ושמה תמר
Gen 38:7 ז ויהי ער בכור יהודה--רע בעיני יהוה וימתהו יהוה
Gen 38:8 ח ויאמר יהודה לאונן בא אל אשת אחיך ויבם אתה והקם זרע לאחיך
Gen 38:9 ט וידע אונן כי לא לו יהיה הזרע והיה אם בא אל אשת אחיו ושחת ארצה לבלתי נתן זרע לאחיו
Gen 38:10 י וירע בעיני יהוה אשר עשה וימת גם אתו
Gen 38:11 יא ויאמר יהודה לתמר כלתו שבי אלמנה בית אביך עד יגדל שלה בני--כי אמר פן ימות גם הוא כאחיו ותלך תמר ותשב בית אביה
Gen 38:12 יב וירבו הימים ותמת בת שוע אשת יהודה וינחם יהודה ויעל על גזזי צאנו הוא וחירה רעהו העדלמי--תמנתה
Gen 38:13 יג ויגד לתמר לאמר  הנה חמיך עלה תמנתה לגז צאנו
Gen 38:14 יד ותסר בגדי אלמנותה מעליה ותכס בצעיף ותתעלף ותשב בפתח עינים אשר על דרך תמנתה  כי ראתה כי גדל שלה והוא לא נתנה לו לאשה
Gen 38:15 טו ויראה יהודה ויחשבה לזונה  כי כסתה פניה
Gen 38:16 טז ויט אליה אל הדרך ויאמר הבה נא אבוא אליך כי לא ידע כי כלתו הוא ותאמר מה תתן לי כי תבוא אלי
Gen 38:17 יז ויאמר אנכי אשלח גדי עזים מן הצאן ותאמר אם תתן ערבון עד שלחך
Gen 38:18 יח ויאמר מה הערבון אשר אתן לך ותאמר חתמך ופתילך ומטך אשר בידך ויתן לה ויבא אליה ותהר לו
Gen 38:19 יט ותקם ותלך ותסר צעיפה מעליה ותלבש בגדי אלמנותה
Gen 38:20 כ וישלח יהודה את גדי העזים ביד רעהו העדלמי לקחת הערבון מיד האשה ולא מצאה
Gen 38:21 כא וישאל את אנשי מקמה לאמר איה הקדשה הוא בעינים על הדרך ויאמרו לא היתה בזה קדשה
Gen 38:22 כב וישב אל יהודה ויאמר לא מצאתיה וגם אנשי המקום אמרו לא היתה בזה קדשה
Gen 38:23 כג ויאמר יהודה תקח לה פן נהיה לבוז הנה שלחתי הגדי הזה ואתה לא מצאתה
Gen 38:24 כד ויהי כמשלש חדשים ויגד ליהודה לאמר זנתה תמר כלתך וגם הנה הרה לזנונים ויאמר יהודה הוציאוה ותשרף
Gen 38:25 כה הוא מוצאת והיא שלחה אל חמיה לאמר לאיש אשר אלה לו אנכי הרה ותאמר הכר נא--למי החתמת והפתילים והמטה האלה
Gen 38:26 כו ויכר יהודה ויאמר צדקה ממני כי על כן לא נתתיה לשלה בני ולא יסף עוד לדעתה
Gen 38:27 כז ויהי בעת לדתה והנה תאומים בבטנה
Gen 38:28 כח ויהי בלדתה ויתן יד ותקח המילדת ותקשר על ידו שני לאמר זה יצא ראשנה
Gen 38:29 כט ויהי כמשיב ידו והנה יצא אחיו ותאמר מה פרצת עליך פרץ ויקרא שמו פרץ
Gen 38:30 ל ואחר יצא אחיו אשר על ידו השני ויקרא שמו זרח  {ס}