Allepo, Genesis, Chapter 06

Gen 6:1 א ויהי כי החל האדם לרב על פני האדמה ובנות ילדו להם
Gen 6:2 ב ויראו בני האלהים את בנות האדם כי טבת הנה ויקחו להם נשים מכל אשר בחרו
Gen 6:3 ג ויאמר יהוה לא ידון רוחי באדם לעלם בשגם הוא בשר והיו ימיו מאה ועשרים שנה
Gen 6:4 ד הנפלים היו בארץ בימים ההם וגם אחרי כן אשר יבאו בני האלהים אל בנות האדם וילדו להם  המה הגברים אשר מעולם אנשי השם  {פ}
Gen 6:5 ה וירא יהוה כי רבה רעת האדם בארץ וכל יצר מחשבת לבו רק רע כל היום
Gen 6:6 ו וינחם יהוה כי עשה את האדם בארץ ויתעצב אל לבו
Gen 6:7 ז ויאמר יהוה אמחה את האדם אשר בראתי מעל פני האדמה מאדם עד בהמה עד רמש ועד עוף השמים  כי נחמתי כי עשיתם
Gen 6:8 ח ונח מצא חן בעיני יהוה  {פ}
Gen 6:9 ט אלה תולדת נח--נח איש צדיק תמים היה בדרתיו  את האלהים התהלך נח
Gen 6:10 י ויולד נח שלשה בנים--את שם את חם ואת יפת
Gen 6:11 יא ותשחת הארץ לפני האלהים ותמלא הארץ חמס
Gen 6:12 יב וירא אלהים את הארץ והנה נשחתה  כי השחית כל בשר את דרכו על הארץ  {ס}
Gen 6:13 יג ויאמר אלהים לנח קץ כל בשר בא לפני--כי מלאה הארץ חמס מפניהם והנני משחיתם את הארץ
Gen 6:14 יד עשה לך תבת עצי גפר קנים תעשה את התבה וכפרת אתה מבית ומחוץ בכפר
Gen 6:15 טו וזה אשר תעשה אתה  שלש מאות אמה ארך התבה חמשים אמה רחבה ושלשים אמה קומתה
Gen 6:16 טז צהר תעשה לתבה ואל אמה תכלנה מלמעלה ופתח התבה בצדה תשים תחתים שנים ושלשים תעשה
Gen 6:17 יז ואני הנני מביא את המבול מים על הארץ לשחת כל בשר אשר בו רוח חיים מתחת השמים  כל אשר בארץ יגוע
Gen 6:18 יח והקמתי את בריתי אתך ובאת אל התבה--אתה ובניך ואשתך ונשי בניך אתך
Gen 6:19 יט ומכל החי מכל בשר שנים מכל תביא אל התבה--להחית אתך  זכר ונקבה יהיו
Gen 6:20 כ מהעוף למינהו ומן הבהמה למינה מכל רמש האדמה למינהו--שנים מכל יבאו אליך להחיות
Gen 6:21 כא ואתה קח לך מכל מאכל אשר יאכל ואספת אליך והיה לך ולהם לאכלה
Gen 6:22 כב ויעש נח  ככל אשר צוה אתו אלהים--כן עשה