Psa 2:1 א  למה רגשו גוים    ולאמים יהגו-ריק
Psa 2:2 ב  יתיצבו מלכי-ארץ--    ורוזנים נוסדו-יחד על-יהוה    ועל-משיחו
Psa 2:3 ג  ננתקה את-מוסרותימו    ונשליכה ממנו עבתימו
Psa 2:4 ד  יושב בשמים ישחק    אדני ילעג-למו
Psa 2:5 ה  אז ידבר אלימו באפו    ובחרונו יבהלמו
Psa 2:6 ו  ואני נסכתי מלכי    על-ציון הר-קדשי
Psa 2:7 ז  אספרה אל-חק    יהוה אמר אלי בני אתה--אני היום ילדתיך
Psa 2:8 ח  שאל ממני--ואתנה גוים נחלתך    ואחזתך אפסי-ארץ
Psa 2:9 ט  תרעם בשבט ברזל    ככלי יוצר תנפצם
Psa 2:10 י  ועתה מלכים השכילו    הוסרו שפטי ארץ
Psa 2:11 יא  עבדו את-יהוה ביראה    וגילו ברעדה
Psa 2:12 יב  נשקו-בר פן-יאנף ותאבדו דרך--    כי-יבער כמעט אפו אשרי    כל-חוסי בו