Exo 1:1 א ואלה שמות בני ישראל הבאים מצרימה  את יעקב איש וביתו באו
Exo 1:2 ב ראובן שמעון לוי ויהודה
Exo 1:3 ג יששכר זבולן ובנימן
Exo 1:4 ד דן ונפתלי גד ואשר
Exo 1:5 ה ויהי כל נפש יצאי ירך יעקב--שבעים נפש ויוסף היה במצרים
Exo 1:6 ו וימת יוסף וכל אחיו וכל הדור ההוא
Exo 1:7 ז ובני ישראל פרו וישרצו וירבו ויעצמו--במאד מאד ותמלא הארץ אתם  {פ}
Exo 1:8 ח ויקם מלך חדש על מצרים אשר לא ידע את יוסף
Exo 1:9 ט ויאמר אל עמו  הנה עם בני ישראל--רב ועצום ממנו
Exo 1:10 י הבה נתחכמה לו  פן ירבה והיה כי תקראנה מלחמה ונוסף גם הוא על שנאינו ונלחם בנו ועלה מן הארץ
Exo 1:11 יא וישימו עליו שרי מסים למען ענתו בסבלתם ויבן ערי מסכנות לפרעה--את פתם ואת רעמסס
Exo 1:12 יב וכאשר יענו אתו כן ירבה וכן יפרץ ויקצו מפני בני ישראל
Exo 1:13 יג ויעבדו מצרים את בני ישראל בפרך
Exo 1:14 יד וימררו את חייהם בעבדה קשה בחמר ובלבנים ובכל עבדה בשדה--את כל עבדתם אשר עבדו בהם בפרך
Exo 1:15 טו ויאמר מלך מצרים למילדת העברית אשר שם האחת שפרה ושם השנית פועה
Exo 1:16 טז ויאמר בילדכן את העבריות וראיתן על האבנים  אם בן הוא והמתן אתו ואם בת הוא וחיה
Exo 1:17 יז ותיראן המילדת את האלהים ולא עשו כאשר דבר אליהן מלך מצרים ותחיין את הילדים
Exo 1:18 יח ויקרא מלך מצרים למילדת ויאמר להן מדוע עשיתן הדבר הזה ותחיין את הילדים
Exo 1:19 יט ותאמרן המילדת אל פרעה כי לא כנשים המצרית העברית  כי חיות הנה בטרם תבוא אלהן המילדת וילדו
Exo 1:20 כ וייטב אלהים למילדת וירב העם ויעצמו מאד
Exo 1:21 כא ויהי כי יראו המילדת את האלהים ויעש להם בתים
Exo 1:22 כב ויצו פרעה לכל עמו לאמר  כל הבן הילוד היארה תשליכהו וכל הבת תחיון  {פ}