Gen 12:1 א ויאמר יהוה אל אברם לך לך מארצך וממולדתך ומבית אביך אל הארץ אשר אראך
Gen 12:2 ב ואעשך לגוי גדול ואברכך ואגדלה שמך והיה ברכה
Gen 12:3 ג ואברכה מברכיך ומקללך אאר ונברכו בך כל משפחת האדמה
Gen 12:4 ד וילך אברם כאשר דבר אליו יהוה וילך אתו לוט ואברם בן חמש שנים ושבעים שנה בצאתו מחרן
Gen 12:5 ה ויקח אברם את שרי אשתו ואת לוט בן אחיו ואת כל רכושם אשר רכשו ואת הנפש אשר עשו בחרן ויצאו ללכת ארצה כנען ויבאו ארצה כנען
Gen 12:6 ו ויעבר אברם בארץ עד מקום שכם עד אלון מורה והכנעני אז בארץ
Gen 12:7 ז וירא יהוה אל אברם ויאמר לזרעך אתן את הארץ הזאת ויבן שם מזבח ליהוה הנראה אליו
Gen 12:8 ח ויעתק משם ההרה מקדם לבית אל--ויט אהלה בית אל מים והעי מקדם ויבן שם מזבח ליהוה ויקרא בשם יהוה
Gen 12:9 ט ויסע אברם הלוך ונסוע הנגבה  {פ}
Gen 12:10 י ויהי רעב בארץ וירד אברם מצרימה לגור שם כי כבד הרעב בארץ
Gen 12:11 יא ויהי כאשר הקריב לבוא מצרימה ויאמר אל שרי אשתו הנה נא ידעתי כי אשה יפת מראה את
Gen 12:12 יב והיה כי יראו אתך המצרים ואמרו אשתו זאת והרגו אתי ואתך יחיו
Gen 12:13 יג אמרי נא אחתי את--למען ייטב לי בעבורך וחיתה נפשי בגללך
Gen 12:14 יד ויהי כבוא אברם מצרימה ויראו המצרים את האשה כי יפה הוא מאד
Gen 12:15 טו ויראו אתה שרי פרעה ויהללו אתה אל פרעה ותקח האשה בית פרעה
Gen 12:16 טז ולאברם היטיב בעבורה ויהי לו צאן ובקר וחמרים ועבדים ושפחת ואתנת וגמלים
Gen 12:17 יז וינגע יהוה את פרעה נגעים גדלים ואת ביתו על דבר שרי אשת אברם
Gen 12:18 יח ויקרא פרעה לאברם ויאמר מה זאת עשית לי למה לא הגדת לי כי אשתך הוא
Gen 12:19 יט למה אמרת אחתי הוא ואקח אתה לי לאשה ועתה הנה אשתך קח ולך
Gen 12:20 כ ויצו עליו פרעה אנשים וישלחו אתו ואת אשתו ואת כל אשר לו