Mic 7:1 א אללי לי כי הייתי כאספי קיץ כעללת בציר  אין אשכול לאכול בכורה אותה נפשי
Mic 7:2 ב אבד חסיד מן הארץ וישר באדם אין  כלם לדמים יארבו איש את אחיהו יצודו חרם
Mic 7:3 ג על הרע כפים להיטיב השר שאל והשפט בשלום והגדול דבר הות נפשו הוא--ויעבתוה
Mic 7:4 ד טובם כחדק ישר ממסוכה יום מצפיך פקדתך באה עתה תהיה מבוכתם
Mic 7:5 ה אל תאמינו ברע אל תבטחו באלוף משכבת חיקך שמר פתחי פיך
Mic 7:6 ו כי בן מנבל אב בת קמה באמה כלה בחמתה  איבי איש אנשי ביתו
Mic 7:7 ז ואני ביהוה אצפה אוחילה לאלהי ישעי  ישמעני אלהי
Mic 7:8 ח אל תשמחי איבתי לי כי נפלתי קמתי  כי אשב בחשך יהוה אור לי  {פ}
Mic 7:9 ט זעף יהוה אשא כי חטאתי לו  עד אשר יריב ריבי ועשה משפטי--יוציאני לאור אראה בצדקתו
Mic 7:10 י ותרא איבתי ותכסה בושה--האמרה אלי איו יהוה אלהיך עיני תראינה בה עתה תהיה למרמס כטיט חוצות
Mic 7:11 יא יום לבנות גדריך יום ההוא ירחק חק
Mic 7:12 יב יום הוא ועדיך יבוא למני אשור וערי מצור ולמני מצור ועד נהר וים מים והר ההר
Mic 7:13 יג והיתה הארץ לשממה על ישביה מפרי מעלליהם  {פ}
Mic 7:14 יד רעה עמך בשבטך צאן נחלתך--שכני לבדד יער בתוך כרמל ירעו בשן וגלעד כימי עולם
Mic 7:15 טו כימי צאתך מארץ מצרים אראנו נפלאות
Mic 7:16 טז יראו גוים ויבשו מכל גבורתם ישימו יד על פה אזניהם תחרשנה
Mic 7:17 יז ילחכו עפר כנחש--כזחלי ארץ ירגזו ממסגרתיהם אל יהוה אלהינו יפחדו ויראו ממך
Mic 7:18 יח מי אל כמוך נשא עון ועבר על פשע לשארית נחלתו  לא החזיק לעד אפו כי חפץ חסד הוא
Mic 7:19 יט ישוב ירחמנו יכבש עונתינו ותשליך במצלות ים כל חטאותם
Mic 7:20 כ תתן אמת ליעקב חסד לאברהם אשר נשבעת לאבתינו מימי קדם  {ש}