Allepo, Psalms, Chapter 095

Psa 95:1 א  לכו נרננה ליהוה    נריעה לצור ישענו
Psa 95:2 ב  נקדמה פניו בתודה    בזמרות נריע לו
Psa 95:3 ג  כי אל גדול יהוה    ומלך גדול על-כל-אלהים
Psa 95:4 ד  אשר בידו מחקרי-ארץ    ותועפת הרים לו
Psa 95:5 ה  אשר-לו הים והוא עשהו    ויבשת ידיו יצרו
Psa 95:6 ו  באו נשתחוה ונכרעה    נברכה לפני-יהוה עשנו
Psa 95:7 ז  כי הוא אלהינו--    ואנחנו עם מרעיתו וצאן ידו היום    אם-בקלו תשמעו
Psa 95:8 ח  אל-תקשו לבבכם כמריבה    כיום מסה במדבר
Psa 95:9 ט  אשר נסוני אבותיכם    בחנוני גם-ראו פעלי
Psa 95:10 י  ארבעים שנה אקוט בדור--    ואמר עם תעי לבב הם והם    לא-ידעו דרכי
Psa 95:11 יא  אשר-נשבעתי באפי    אם-יבאון אל-מנוחתי