Targum, Zechariah, Chapter 14

Zech 14:1 הָא יוֹמָא עֲתִיד לְמֵיתֵי מִן קְֹדָם יוי וִיפַלגוּן בֵית יִשרָאֵל נִכסֵי עַמְמַיָא בְגַוִיך יְרוּשלַם׃
Zech 14:2 וַאֲכַנֵיש יָת כָל עַמְמַיָא לִירוּשלַם לַאֲגָחָא קְרָבָא וְתִתכְבֵיש קַרתָא וְיִתבַזְזוּן בָתַיָא וֻנשַיָא יִשתַכבָן וְיִפוֹק פַלגַה דְקַרתָא בְגָלוּתָא וֻשאָר עַמָא לָא יִפסוּק מִן קַרתָא׃
Zech 14:3 וְיִתגְלֵי יוי וִיגִיַח קְרָבָא בְעַמְמַיָא הָאִנוּן כְיוֹם אֲגָחוּתֵיה קְרָב עַל יַמָא דְסוּף׃
Zech 14:4 ​וְיִתגְלֵי בִגבוּרְתֵיה עַל טוּר זֵיתַיָא דְעַל אַפֵי יְרוּשלַם מִמַדנְחָא וְיִתבְזַע טוּר זֵיתַיָא מִפַלגֵיה לְמַדנְחָא וֻלמַערְבָא חִילָא רַבָא לַחדָא וְיִתְלָש פַלגֵיה דְטוּרָא לְצִפוּנָא וֻפַלגֵיה לְדָרוֹמָא׃
Zech 14:5 וְיִסתְתֵים חִילָא דְטוּרַיָא אֲרֵי יִמטֵי חִילַת טוּרַיָא לְאָצַל וְתִערְקוּן כְמָא דַעֲרַקתוּן מִן קְֹדָם זְיָעָא דַהֲוָה בְיוֹמֵי עוּזִיָה מַלַך שִבטָא דְבֵית יְהוּדָה וְיִתגְלֵי יוי אֲלָהִי כָל קַדִישוֹהִי עִמֵיה׃
Zech 14:6 וִיהֵי בְעִדָנָא הַהוּא לָא יְהֵי נְהוֹרָא אֲלָהֵין {עֲדַי} וֻגלִיד״תליד#3#״׃
Zech 14:7 וִיהֵי יוֹמָא חַד הוּא יְהֵי״#2#״ יְדִיַע קְֹדָם יוי לָא כְנֵיהוֹר יִימַם וְלָא כִקבַל לֵילֵי וִיהֵי לְעִידָן צַפרָא״רַמשָא#2#״ יְהֵי נְהוֹרַא׃
Zech 14:8 וִיהֵי בְעִדָנָא הַהוּא יִפְקוּן״יהי נפיק#3#״ מֵי מַבוּעַ מִירוּשלַם פַלגהוֹן לְיַמָא מַדנָחָאָה וֻפַלגְהוֹן לְיַמָא מַערְבָאָה בְקֵיטָא וֻבסִתוָא יְהוֹן נָפְקִין׃
Zech 14:9 וְתִתגְלֵי מַלכוּתָא דַיוי עַל כָל יָתְבֵי אַרעָא בְעִידָנָא הַהוּא יִפלְחוּן קְֹדָם יוי כְתַף חַד אֲרֵי שְמֵיה יַצִיב בְעָלְמָא לֵית בָר מִנֵיה׃
Zech 14:10 יַקְפַה לְכָל אַרעָא כְמֵישְרָא מִגְבַע לְרִמוֹן דָרוֹם יְרוּשלַם וְתִתרַבֵי וְתִתֵיב בְאַתרַה לְמִתְרַע שֵיבַט בִניָמִן עַד אֲתַר תַרעָא קַדמָאָה עַד תְרַע זָוָיתָא וֻמִגדַל פְקוֹס עַד שֵיחִי מַלכָא׃
Zech 14:11 וְיִתְבוּן בַה וְקַטלָא לָא יְהֵי עוֹד וְתִתֵיב יְרוּשלַם לְרוּחצָן׃
Zech 14:12 וְדָא תְהֵי מַחֲתָא דְיִמחֵי יוי יָת כָל עַמְמַיָא דְמִתכַנשִין וְאָתַן עַל יְרוּשלַם יִתמְסֵי בִסרֵיה וְהוּא קָאֵים עַל רַגלוֹהִי וְעֵינוֹהִי יִתמַסיָן בְגִלגְלֵיהוֹן וְלִישָנְהוֹן יִתמְסֵי בְפוּמְהוֹן׃
Zech 14:13 וִיהֵי בְעִדָנָא הַהוּא יְהֵי שִגוּש קַטלָא מִן קְֹדָם יוי סַגִי בְהוֹן וְיִתַקפוּן גְבַר בְיַד חַברֵיה וְתִתְלָש יְדֵיה עִם יְדָא דְחַברֵיה׃
Zech 14:14 וְאַף דְבֵית יְהוּדָה יַיתֵינוּן עַמְמַיָא כִיַד״כִיד#2#״ אֲנִיסִין לְאָגָחָא קְרָבָא בִירוּשלַם וְיִכנְשוּן נִכסֵי כָל עַמְמַיָא סְחוֹר סְחוֹר דַהבָא וְכַספָא וֻלבוּשִין לִסגֵי לַחדָא׃
Zech 14:15 וְכֵין תְהֵי מַחַת סוּסָיא כוֹדַנָיא גַמלָא וַחֲמָרָא וְכָל בְעִירָא דִיהֵי בְמַשרְיָתָא הָאִנוּן כְמַחֲתָא הָדָא׃
Zech 14:16 וִיהֵי כָל דְיִשתְאָר מִכָל עַמְמַיָא דְמִתכַנשִין וְאַתַין עַל יְרוּשלַם וְיִסְקוּן כִזמַן \שְנָא בִשנָא ״שתא בשתא#3#״ לְמִסגַד קְֹדָם מַלַך עָלְמַיָא יוי צְבָאוֹת וֻלמֵיחַג יָת חַגָא דִמטַלַיָא׃
Zech 14:17 וִיהֵי דְלָא יִסַק מִן זַרעִייָת עַמְמֵי אַרעָא לִירוּשלַם לְמִסגַד קְֹדָם מַלַך עַלְמַיָא יוי צְבָאוֹת וְלָא עֲלֵיהוֹן יְהֵי מִטרָא׃
Zech 14:18 וְאִם מַלכוּת מִצרַיִם לָא תִיסַק וְלָא תֵיתֵי וְלָא לְהוֹן יִסַק נִינוֹס״נילוס#3#״ בְרַם עֲלֵיהוֹן תְהֵי מַחֲתָא דְיִמחֵי יוי יָת כָל עַמְמַיָא דְלָא יִסְקוּן לְמֵיחַג יָת חַגָא דִמטַלַיָא׃
Zech 14:19 דָא תְהֵי פוּרעָנוּת״חובת#3#״ מִצרָאֵי וֻפוּרעָנוּת״וחובת#3#״ כָל עַמְמַיָא דְלָא יִסְקוּן לְמֵיחַג יַת חַגָא דִמטַלַיָא׃
Zech 14:20 בְעִדָנָא הַהוּא יְהֵי עַל כְרוֹרַת״בדורת#3#״כרובת#3#״ סוּסיָא קוּדשָא קְֹדָם יוי וִיהוֹן דוּדַיָא בְבֵית מַקדְשָא דַיוי סַגִיאִין כְמִזרְקַיָא קְֹדָם מַדבְחָא׃
Zech 14:21 וִיהֵי כָל דוּד בִירוּשלַם וֻבִיהוּדָה קוּדשָא קְֹדָם יוי צְבָאוֹת וְיֵיתוֹן כָל דְדָבְחִין וְיִסְבוּן מִנְהוֹן וִיבַשְלוּן בְהוֹן וְלָא יְהֵי עָבֵיד תִגרָא עוֹד בְבֵית מַקדְשָא דַיוי צְבָאוֹת בְעִידָנָא הַהוּא׃