Gen 46:1 וּנְטַל יִשְׂרָאֵל וְכָל דְּלֵיהּ וַאֲתָא לִבְאֵר שָׁבַע; וְדַבַּח דִּבְחִין לֵאלָהָא דַּאֲבוּהִי יִצְחָק. 
Gen 46:2 וַאֲמַר יְיָ לְיִשְׂרָאֵל בְּחֶזְוָא דְּלֵילְיָא וַאֲמַר יַעֲקוֹב יַעֲקוֹב; וַאֲמַר הָאֲנָא. 
Gen 46:3 וַאֲמַר אֲנָא אֵל אֱלָהָא דַּאֲבוּךְ; לָא תִּדְחַל מִלְּמֵיחַת לְמִצְרַיִם אֲרֵי לְעַם סַגִּי אֲשַׁוֵּינָךְ תַּמָּן. 
Gen 46:4 אֲנָא אֵיחוֹת עִמָּךְ לְמִצְרַיִם וַאֲנָא אַסְּקִנָּךְ אַף אַסָּקָא; וְיוֹסֵף יְשַׁוֵּי יְדוֹהִי עַל עֵינָךְ. 
Gen 46:5 וְקָם יַעֲקוֹב מִבְּאֵר שָׁבַע; וּנְטַלוּ בְּנֵי יִשְׂרָאֵל יָת יַעֲקוֹב אֲבוּהוֹן וְיָת טַפְלְהוֹן וְיָת נְשֵׁיהוֹן בְּעֶגְלָתָא דִּשְׁלַח פַּרְעֹה לְמִטַּל יָתֵיהּ. 
Gen 46:6 וּדְבַרוּ יָת גֵּיתֵיהוֹן וְיָת קִנְיָנְהוֹן דִּקְנוֹ בְּאַרְעָא דִּכְנַעַן וַאֲתוֹ לְמִצְרָיִם:  יַעֲקוֹב וְכָל בְּנוֹהִי עִמֵּיהּ. 
Gen 46:7 בְּנוֹהִי וּבְנֵי בְּנוֹהִי עִמֵּיהּ בְּנָתֵיהּ וּבְנָת בְּנוֹהִי וְכָל בְּנוֹהִי--אַיְתִי עִמֵּיהּ לְמִצְרָיִם.  {ס}
Gen 46:8 וְאִלֵּין שְׁמָהָת בְּנֵי יִשְׂרָאֵל דְּעָאלוּ לְמִצְרַיִם יַעֲקוֹב וּבְנוֹהִי:  בֻּכְרֵיהּ דְּיַעֲקוֹב רְאוּבֵן. 
Gen 46:9 וּבְנֵי רְאוּבֵן--חֲנוֹךְ וּפַלּוּא וְחֶצְרוֹן וְכַרְמִי. 
Gen 46:10 וּבְנֵי שִׁמְעוֹן יְמוּאֵל וְיָמִין וְאֹהַד--וְיָכִין וְצֹחַר; וְשָׁאוּל בַּר כְּנַעֲנֵיתָא. 
Gen 46:11 וּבְנֵי לֵוִי--גֵּרְשׁוֹן קְהָת וּמְרָרִי. 
Gen 46:12 וּבְנֵי יְהוּדָה עֵר וְאוֹנָן וְשֵׁלָה--וָפֶרֶץ וָזָרַח; וּמִית עֵר וְאוֹנָן בְּאַרְעָא דִּכְנַעַן וַהֲווֹ בְּנֵי פֶּרֶץ חֶצְרוֹן וְחָמוּל. 
Gen 46:13 וּבְנֵי יִשָּׂשכָר--תּוֹלָע וּפֻוָה וְיוֹב וְשִׁמְרוֹן. 
Gen 46:14 וּבְנֵי זְבוּלוּן--סֶרֶד וְאֵילוֹן וְיַחְלְאֵל. 
Gen 46:15 אִלֵּין בְּנֵי לֵאָה דִּילֵידַת לְיַעֲקוֹב בְּפַדַּן אֲרָם וְיָת דִּינָה בְּרַתֵּיהּ:  כָּל נְפַשׁ בְּנוֹהִי וּבְנָתֵיהּ תְּלָתִין וּתְלָת. 
Gen 46:16 וּבְנֵי גָּד צִפְיוֹן וְחַגִּי שׁוּנִי וְאֶצְבּוֹן עֵרִי וַאֲרוֹדִי וְאַרְאֵלִי. 
Gen 46:17 וּבְנֵי אָשֵׁר יִמְנָה וְיִשְׁוָה וְיִשְׁוִי וּבְרִיעָה--וְשֶׂרַח אֲחָתְהוֹן; וּבְנֵי בְּרִיעָה חֶבֶר וּמַלְכִּיאֵל. 
Gen 46:18 אִלֵּין בְּנֵי זִלְפָּה דִּיהַב לָבָן לְלֵאָה בְּרַתֵּיהּ; וִילֵידַת יָת אִלֵּין לְיַעֲקוֹב שֵׁית עַסְרֵי נַפְשָׁן. 
Gen 46:19 בְּנֵי רָחֵל אִתַּת יַעֲקוֹב יוֹסֵף וּבִנְיָמִין. 
Gen 46:20 וְאִתְיְלֵיד לְיוֹסֵף בְּאַרְעָא דְּמִצְרַיִם דִּילֵידַת לֵיהּ אָסְנַת בַּת פּוֹטִי פֶרַע רַבָּא דְּאוֹן--יָת מְנַשֶּׁה וְיָת אֶפְרָיִם. 
Gen 46:21 וּבְנֵי בִּנְיָמִין בֶּלַע וָבֶכֶר וְאַשְׁבֵּל גֵּרָא וְנַעֲמָן אֵחִי וָרֹאשׁ; מֻפִּים וְחֻפִּים וָאָרְדְּ. 
Gen 46:22 אִלֵּין בְּנֵי רָחֵל דְּאִתְיְלִידוּ לְיַעֲקוֹב--כָּל נַפְשָׁתָא אַרְבַּע עַסְרֵי. 
Gen 46:23 וּבְנֵי דָּן חוּשִׁים. 
Gen 46:24 וּבְנֵי נַפְתָּלִי--יַחְצְאֵל וְגוּנִי וְיֵצֶר וְשִׁלֵּם. 
Gen 46:25 אִלֵּין בְּנֵי בִּלְהָה דִּיהַב לָבָן לְרָחֵל בְּרַתֵּיהּ; וִילֵידַת יָת אִלֵּין לְיַעֲקוֹב כָּל נַפְשָׁתָא שְׁבַע. 
Gen 46:26 כָּל נַפְשָׁתָא דְּעַאלָא עִם יַעֲקוֹב לְמִצְרַיִם נָפְקֵי יִרְכֵּיהּ בָּר מִנְּשֵׁי בְּנֵי יַעֲקוֹב--כָּל נַפְשָׁתָא שִׁתִּין וְשֵׁית. 
Gen 46:27 וּבְנֵי יוֹסֵף דְּאִתְיְלִידוּ לֵיהּ בְּמִצְרַיִם נַפְשָׁתָא תַּרְתֵּין:  כָּל נַפְשָׁתָא לְבֵית יַעֲקוֹב דְּעַאלָא לְמִצְרַיִם שִׁבְעִין.  {ס}
Gen 46:28 וְיָת יְהוּדָה שְׁלַח קֳדָמוֹהִי לְוָת יוֹסֵף לְפַנָּאָה קֳדָמוֹהִי לְגֹשֶׁן; וַאֲתוֹ לְאַרְעָא דְּגֹשֶׁן. 
Gen 46:29 וְטַקֵּיס יוֹסֵף רְתִכּוֹהִי וּסְלֵיק לְקַדָּמוּת יִשְׂרָאֵל אֲבוּהִי לְגֹשֶׁן; וְאִתַּחְזֵי לֵיהּ וּנְפַל עַל צַוְרֵיהּ וּבְכָא עַל צַוְרֵיהּ עוֹד. 
Gen 46:30 וַאֲמַר יִשְׂרָאֵל לְיוֹסֵף אִלּוּ אֲנָא מָאִית זִמְנָא הָדָא מִנַּחַם אֲנָא בָּתַר דַּחֲזֵיתִנּוּן לְאַפָּךְ אֲרֵי עַד כְּעַן קַיָּם אַתְּ. 
Gen 46:31 וַאֲמַר יוֹסֵף לַאֲחוֹהִי וּלְבֵית אֲבוּהִי אֶסַּק וַאֲחַוֵּי לְפַרְעֹה; וְאֵימַר לֵיהּ אַחַי וּבֵית אַבָּא דִּבְאַרְעָא דִּכְנַעַן אֲתוֹ לְוָתִי. 
Gen 46:32 וְגֻבְרַיָּא רָעַן עָנָא אֲרֵי גֻּבְרֵי מָרֵי גֵּיתֵי הֲווֹ; וְעָנְהוֹן וְתוֹרֵיהוֹן וְכָל דִּילְהוֹן אֵיתִיאוּ. 
Gen 46:33 וִיהֵי אֲרֵי יִקְרֵי לְכוֹן פַּרְעֹה; וְיֵימַר מָא עוּבָדֵיכוֹן. 
Gen 46:34 וְתֵימְרוּן גֻּבְרֵי מָרֵי גֵּיתֵי הֲווֹ עַבְדָּךְ מִזְּעוּרַנָא וְעַד כְּעַן--אַף אֲנַחְנָא אַף אֲבָהָתַנָא:  בְּדִיל דְּתִתְּבוּן בְּאַרְעָא דְּגֹשֶׁן אֲרֵי מְרַחֲקִין מִצְרָאֵי כָּל רָעֵי עָנָא.