The Song of Deborah and Barak

Jdg 5:1 cecineruntque Debbora et Barac filius Abinoem in die illo dicentes

Jdg 5:2 qui sponte obtulistis de Israhel animas vestras ad periculum benedicite Domino

Jdg 5:3 audite reges percipite auribus principes ego sum ego sum quae Domino canam psallam Domino Deo Israhel

Jdg 5:4 Domine cum exires de Seir et transires per regiones Edom terra mota est caelique ac nubes stillaverunt aquis

Jdg 5:5 montes fluxerunt a facie Domini et Sinai a facie Domini Dei Israhel

Jdg 5:6 in diebus Samgar filii Anath in diebus Iahel quieverunt semitae et qui ingrediebantur per eas ambulaverunt per calles devios

Jdg 5:7 cessaverunt fortes in Israhel et quieverunt donec surgeret Debbora surgeret mater in Israhel

Jdg 5:8 nova bella elegit Dominus et portas hostium ipse subvertit clypeus et hasta si apparuerint in quadraginta milibus Israhel

Jdg 5:9 cor meum diligit principes Israhel qui propria voluntate obtulistis vos discrimini benedicite Domino

Jdg 5:10 qui ascenditis super nitentes asinos et sedetis in iudicio et ambulatis in via loquimini

Jdg 5:11 ubi conlisi sunt currus et hostium est suffocatus exercitus ibi narrentur iustitiae Domini et clementia in fortes Israhel tunc descendit populus Domini ad portas et obtinuit principatum

Jdg 5:12 surge surge Debbora surge surge et loquere canticum surge Barac et adprehende captivos tuos fili Abinoem

Jdg 5:13 salvatae sunt reliquiae populi Dominus in fortibus dimicavit

Jdg 5:14 ex Ephraim delevit eos in Amalech et post eum ex Beniamin in populos tuos o Amalech de Machir principes descenderunt et de Zabulon qui exercitum ducerent ad bellandum

Jdg 5:15 duces Isachar fuere cum Debbora et Barac vestigia sunt secuti qui quasi in praeceps ac baratrum se discrimini dedit diviso contra se Ruben magnanimorum repperta contentio est

Jdg 5:16 quare habitas inter duos terminos ut audias sibilos gregum diviso contra se Ruben magnanimorum repperta contentio est

Jdg 5:17 Galaad trans Iordanem quiescebat et Dan vacabat navibus Aser habitabat in litore maris et in portibus morabatur

Jdg 5:18 Zabulon vero et Nepthalim obtulerunt animas suas morti in regione Merome

Jdg 5:19 venerunt reges et pugnaverunt pugnaverunt reges Chanaan in Thanach iuxta aquas Mageddo et tamen nihil tulere praedantes

Jdg 5:20 de caelo dimicatum est contra eos stellae manentes in ordine et cursu suo adversum Sisaram pugnaverunt

Jdg 5:21 torrens Cison traxit cadavera eorum torrens Cadumim torrens Cison conculca anima mea robustos

Jdg 5:22 ungulae equorum ceciderunt fugientibus impetu et per praeceps ruentibus fortissimis hostium

Jdg 5:23 maledicite terrae Meroz dixit angelus Domini maledicite habitatoribus eius quia non venerunt ad auxilium Domini in adiutorium fortissimorum eius

Jdg 5:24 benedicta inter mulieres Iahel uxor Aber Cinei benedicatur in tabernaculo suo

Jdg 5:25 aquam petenti lac dedit et in fiala principum obtulit butyrum

Jdg 5:26 sinistram manum misit ad clavum et dexteram ad fabrorum malleos percussitque Sisaram quaerens in capite vulneri locum et tempus valide perforans

Jdg 5:27 inter pedes eius ruit defecit et mortuus est ante pedes illius volvebatur et iacebat exanimis et miserabilis

Jdg 5:28 per fenestram prospiciens ululabat mater eius et de cenaculo loquebatur cur moratur regredi currus eius quare tardaverunt pedes quadrigarum illius

Jdg 5:29 una sapientior ceteris uxoribus eius haec socrui verba respondit

Jdg 5:30 forsitan nunc dividit spolia et pulcherrima feminarum eligitur ei vestes diversorum colorum Sisarae traduntur in praedam et supellex varia ad ornanda colla congeritur

Jdg 5:31 sic pereant omnes inimici tui Domine qui autem diligunt te sicut sol in ortu suo splendet ita rutilent (5:32) quievitque terra per quadraginta annos