Hos 12:1 א סבבני בכחש אפרים ובמרמה בית ישראל ויהודה עד רד עם אל ועם קדושים נאמן
Hos 12:2 ב אפרים רעה רוח ורדף קדים--כל היום כזב ושד ירבה וברית עם אשור יכרתו ושמן למצרים יובל
Hos 12:3 ג וריב ליהוה עם יהודה ולפקד על יעקב כדרכיו כמעלליו ישיב לו
Hos 12:4 ד בבטן עקב את אחיו ובאונו שרה את אלהים
Hos 12:5 ה וישר אל מלאך ויכל בכה ויתחנן לו בית אל ימצאנו ושם ידבר עמנו
Hos 12:6 ו ויהוה אלהי הצבאות--יהוה זכרו
Hos 12:7 ז ואתה באלהיך תשוב חסד ומשפט שמר וקוה אל אלהיך תמיד
Hos 12:8 ח כנען בידו מאזני מרמה--לעשק אהב
Hos 12:9 ט ויאמר אפרים--אך עשרתי מצאתי און לי כל יגיעי לא ימצאו לי עון אשר חטא
Hos 12:10 י ואנכי יהוה אלהיך מארץ מצרים עד אושיבך באהלים כימי מועד
Hos 12:11 יא ודברתי על הנביאים ואנכי חזון הרביתי וביד הנביאים אדמה
Hos 12:12 יב אם גלעד און אך שוא היו בגלגל שורים זבחו גם מזבחותם כגלים על תלמי שדי
Hos 12:13 יג ויברח יעקב שדה ארם ויעבד ישראל באשה ובאשה שמר
Hos 12:14 יד ובנביא העלה יהוה את ישראל ממצרים ובנביא נשמר [ (Hosea 12:15) טו הכעיס אפרים תמרורים ודמיו עליו יטוש וחרפתו ישיב לו אדניו ]