Allepo, Psalms, Chapter 010

Psa 10:1 א  למה יהוה תעמד ברחוק    תעלים לעתות בצרה
Psa 10:2 ב  בגאות רשע ידלק עני    יתפשו במזמות זו חשבו
Psa 10:3 ג  כי-הלל רשע על-תאות נפשו    ובצע ברך נאץ יהוה
Psa 10:4 ד  רשע--כגבה אפו בל-ידרש    אין אלהים כל-מזמותיו
Psa 10:5 ה  יחילו דרכו בכל-עת--מרום משפטיך מנגדו    כל-צורריו יפיח בהם
Psa 10:6 ו  אמר בלבו בל-אמוט    לדר ודר אשר לא-ברע
Psa 10:7 ז  אלה פיהו מלא--ומרמות ותך    תחת לשונו עמל ואון
Psa 10:8 ח  ישב במארב חצרים--במסתרים יהרג נקי    עיניו לחלכה יצפנו
Psa 10:9 ט  יארב במסתר כאריה בסכה--    יארב לחטוף עני יחטף עני    במשכו ברשתו
Psa 10:10 י  ודכה (ידכה) ישח    ונפל בעצומיו חלכאים (חל כאים)
Psa 10:11 יא  אמר בלבו שכח אל    הסתיר פניו בל-ראה לנצח
Psa 10:12 יב  קומה יהוה--אל נשא ידך    אל-תשכח עניים (ענוים)
Psa 10:13 יג  על-מה נאץ רשע אלהים    אמר בלבו לא תדרש
Psa 10:14 יד  ראתה כי-אתה עמל וכעס תביט--    לתת בידך עליך יעזב חלכה    יתום אתה היית עוזר
Psa 10:15 טו  שבר זרוע רשע    ורע תדרוש-רשעו בל-תמצא
Psa 10:16 טז  יהוה מלך עולם ועד    אבדו גוים מארצו
Psa 10:17 יז  תאות ענוים שמעת יהוה    תכין לבם תקשיב אזנך
Psa 10:18 יח  לשפט יתום ודך    בל-יוסיף עוד--לערץ אנוש מן-הארץ