Num 1:1 א וידבר יהוה אל משה במדבר סיני באהל מועד  באחד לחדש השני בשנה השנית לצאתם מארץ מצרים--לאמר
Num 1:2 ב שאו את ראש כל עדת בני ישראל למשפחתם לבית אבתם--במספר שמות כל זכר לגלגלתם
Num 1:3 ג מבן עשרים שנה ומעלה כל יצא צבא בישראל--תפקדו אתם לצבאתם אתה ואהרן
Num 1:4 ד ואתכם יהיו איש איש למטה--איש ראש לבית אבתיו הוא
Num 1:5 ה ואלה שמות האנשים אשר יעמדו אתכם  לראובן אליצור בן שדיאור
Num 1:6 ו לשמעון שלמיאל בן צורישדי
Num 1:7 ז ליהודה נחשון בן עמינדב
Num 1:8 ח ליששכר נתנאל בן צוער
Num 1:9 ט לזבולן אליאב בן חלן
Num 1:10 י לבני יוסף--לאפרים אלישמע בן עמיהוד למנשה גמליאל בן פדהצור
Num 1:11 יא לבנימן אבידן בן גדעני
Num 1:12 יב לדן אחיעזר בן עמישדי
Num 1:13 יג לאשר פגעיאל בן עכרן
Num 1:14 יד לגד אליסף בן דעואל
Num 1:15 טו לנפתלי אחירע בן עינן
Num 1:16 טז אלה קריאי (קרואי) העדה נשיאי מטות אבותם  ראשי אלפי ישראל הם
Num 1:17 יז ויקח משה ואהרן את האנשים האלה אשר נקבו בשמת
Num 1:18 יח ואת כל העדה הקהילו באחד לחדש השני ויתילדו על משפחתם לבית אבתם  במספר שמות מבן עשרים שנה ומעלה--לגלגלתם
Num 1:19 יט כאשר צוה יהוה את משה ויפקדם במדבר סיני  {ס}
Num 1:20 כ ויהיו בני ראובן בכר ישראל תולדתם למשפחתם לבית אבתם  במספר שמות לגלגלתם--כל זכר מבן עשרים שנה ומעלה כל יצא צבא
Num 1:21 כא פקדיהם למטה ראובן--ששה וארבעים אלף וחמש מאות  {פ}
Num 1:22 כב לבני שמעון תולדתם למשפחתם לבית אבתם  פקדיו במספר שמות לגלגלתם--כל זכר מבן עשרים שנה ומעלה כל יצא צבא
Num 1:23 כג פקדיהם למטה שמעון--תשעה וחמשים אלף ושלש מאות  {פ}
Num 1:24 כד לבני גד תולדתם למשפחתם לבית אבתם  במספר שמות מבן עשרים שנה ומעלה--כל יצא צבא
Num 1:25 כה פקדיהם למטה גד--חמשה וארבעים אלף ושש מאות וחמשים  {פ}
Num 1:26 כו לבני יהודה תולדתם למשפחתם לבית אבתם  במספר שמת מבן עשרים שנה ומעלה--כל יצא צבא
Num 1:27 כז פקדיהם למטה יהודה--ארבעה ושבעים אלף ושש מאות  {פ}
Num 1:28 כח לבני יששכר תולדתם למשפחתם לבית אבתם  במספר שמת מבן עשרים שנה ומעלה--כל יצא צבא
Num 1:29 כט פקדיהם למטה יששכר--ארבעה וחמשים אלף וארבע מאות  {פ}
Num 1:30 ל לבני זבולן תולדתם למשפחתם לבית אבתם  במספר שמת מבן עשרים שנה ומעלה--כל יצא צבא
Num 1:31 לא פקדיהם למטה זבולן--שבעה וחמשים אלף וארבע מאות  {פ}
Num 1:32 לב לבני יוסף לבני אפרים תולדתם למשפחתם לבית אבתם  במספר שמת מבן עשרים שנה ומעלה--כל יצא צבא
Num 1:33 לג פקדיהם למטה אפרים--ארבעים אלף וחמש מאות  {פ}
Num 1:34 לד לבני מנשה תולדתם למשפחתם לבית אבתם  במספר שמות מבן עשרים שנה ומעלה--כל יצא צבא
Num 1:35 לה פקדיהם למטה מנשה--שנים ושלשים אלף ומאתים  {פ}
Num 1:36 לו לבני בנימן תולדתם למשפחתם לבית אבתם  במספר שמת מבן עשרים שנה ומעלה--כל יצא צבא
Num 1:37 לז פקדיהם למטה בנימן--חמשה ושלשים אלף וארבע מאות  {פ}
Num 1:38 לח לבני דן תולדתם למשפחתם לבית אבתם  במספר שמת מבן עשרים שנה ומעלה--כל יצא צבא
Num 1:39 לט פקדיהם למטה דן--שנים וששים אלף ושבע מאות  {פ}
Num 1:40 מ לבני אשר תולדתם למשפחתם לבית אבתם  במספר שמת מבן עשרים שנה ומעלה--כל יצא צבא
Num 1:41 מא פקדיהם למטה אשר--אחד וארבעים אלף וחמש מאות  {פ}
Num 1:42 מב בני נפתלי תולדתם למשפחתם לבית אבתם  במספר שמת מבן עשרים שנה ומעלה--כל יצא צבא
Num 1:43 מג פקדיהם למטה נפתלי--שלשה וחמשים אלף וארבע מאות  {פ}
Num 1:44 מד אלה הפקדים אשר פקד משה ואהרן ונשיאי ישראל--שנים עשר איש  איש אחד לבית אבתיו היו
Num 1:45 מה ויהיו כל פקודי בני ישראל לבית אבתם מבן עשרים שנה ומעלה כל יצא צבא בישראל
Num 1:46 מו ויהיו כל הפקדים--שש מאות אלף ושלשת אלפים וחמש מאות וחמשים
Num 1:47 מז והלוים למטה אבתם--לא התפקדו בתוכם  {פ}
Num 1:48 מח וידבר יהוה אל משה לאמר
Num 1:49 מט אך את מטה לוי לא תפקד ואת ראשם לא תשא בתוך בני ישראל
Num 1:50 נ ואתה הפקד את הלוים על משכן העדת ועל כל כליו ועל כל אשר לו--המה ישאו את המשכן ואת כל כליו והם ישרתהו וסביב למשכן יחנו
Num 1:51 נא ובנסע המשכן יורידו אתו הלוים ובחנת המשכן יקימו אתו הלוים והזר הקרב יומת
Num 1:52 נב וחנו בני ישראל איש על מחנהו ואיש על דגלו לצבאתם
Num 1:53 נג והלוים יחנו סביב למשכן העדת ולא יהיה קצף על עדת בני ישראל ושמרו הלוים את משמרת משכן העדות
Num 1:54 נד ויעשו בני ישראל  ככל אשר צוה יהוה את משה--כן עשו  {פ}