Hos 6:1 יֵימְרוּן אֵיתוֹ וֻנתוּב לְפֻלחָנָא דַיוי אֲרֵי הוּא דִמחַנָא יַסֵינָא וֻדְאַיתִי עֲלַנָא תְבָר יְנִיַח לַנָא׃
Hos 6:2 יְחַיֵינַנָא לְיוֹמֵי נַחָמָתָא דַעֲתִידִין לְמֵיתֵי בְיוֹם אֲחָיוּת מִיתַיָא יְקִימִינַנָא וְנֵיחֵי קְֹדָמוֹהִי׃
Hos 6:3 וְנֵילַף נִרדוֹף לְמִידַע יָת דַחלְתָא דַיוי כְנֵיהוֹר צַפרָא דִמקֻשַט בְמִפְקֵיה וְיַיתֵי בִרכָן לַנָא כִמטַר מְגַבַר וֻכלַקִישָא דִמרַוֵי אַרעָא׃
Hos 6:4 מִן קְֹדָם דִין דִקשוֹט מָא אַעֲבֵיד לְכוֹן דְבֵית אַפרַיִם מָא אַעֲבֵיד לְכוֹן דְבֵית יְהוּדָה וְטָבוּתְכוֹן כַעֲנַן צַפרָא וֻכטַלָא דְמוֹחֵי פְסִיק׃
Hos 6:5 עַל דְאַזהַרתִנוּן בִשלִיחוּת נְבִיַי וְלָא תָבוּ אַיתִיתִי עֲלֵיהוֹן קָטוֹלִין עַל דַעֲבַרוּ עַל מֵימַר רְעוּתִי וְדִינִי כְנֵיהוֹר נָפֵיק׃
Hos 6:6 אֲרֵי בְעָבְדֵי חִסדָא רַעֲוָא קְֹדָמַי מִדְדָבַח וְעָבְדֵי אוֹרָיתָא דַיוי מִמַסְקֵי עֲלָוָן׃
Hos 6:7 וְאִינוּן כְדָרַיָא קַדמָאֵי עֲבַרוּ עַל קְיָמִי בְאֲרַע טָבָא דִיהַבִית לְהוֹן לְמַעֲבַד רְעוּתִי תַמָן שַקַרוּ בְמֵימְרִי׃
Hos 6:8 גִלעָד קִריַת אָנוֹסִין בְנִכלִין אָשְדִין דַם זַכַי׃
Hos 6:9 אִתחַבַרוּ אִנוּן וְכָהֲנֵיהוֹן בְאוֹרַח חֲדָא קָטֲלִין נַפשָן כְתַף חַד אֲרֵי עֵיצַת חְטִין עֲבַדוּ׃
Hos 6:10 בְבֵית יִשרָאֵל חֲזֵיתִי שְנוֹ אַשנִיאוּ קְיָמָא דִי גְזִיר עִמְהוֹן דְלָא לְמִפלַח לְטָעֲוָתָא תָבוּ אִנוּן לְמִטעֵי בָתַר עִגלַיָא בְבֵית אֵל תַמָן טְעוֹ בֵית אַפרַיִם אִסתָאַבוּ בֵית יִשרָאֵל׃
Hos 6:11 אַף דְבֵית יְהוּדָה שָרִיאוּ לְאַסגָאָה חוֹבִין אַף לְהוֹן יִמטֵי קִיצָא בְאָתָבוּתִי גָלְוָת עַמִי׃