Targum, Ezekiel, Chapter 28

Ezek 28:1 וַהֲוָה פִתגָם נְבוּאָה מִן קְֹדָם יוי עִמִי״עלי#3#״ לְמֵימַר׃
Ezek 28:2 בַר אָדָם אֵימַר לְמַלכָא דְצוֹר כִדנָן אֲמַר יוי אֲלֹהִים חֲלָף דִראֵים לִבָך וַאֲמַרת דַחלָא אֲנָא מוֹתַב תַקִיפִין יְתֵיבִית בְגוֹ יַמְמַיָא וְאַת אֲנָשָא וְלֵית בָך צְרוֹך וְחַשֵיבתָא בְלִיבָך דְאַת דַחלָא׃
Ezek 28:3 הָא חַכִים אַת מִדָנִיאֵל כָל רָז לָא אִתכַסַא מִינָך׃
Ezek 28:4 בְחַכמְתָך וֻבסֻכלְתָנוּתָך קְנֵיתָא לָך נִכסִן וֻכנַשתָא דַהבָא וְכַספָא בְאוֹצְרָך׃
Ezek 28:5 בִסגֵי חָכמְתָך בִסחוֹרְתָך אַסגִיתָא מַשרְיָתָך וֻראֵים לִיבָך בְמַשרְיָתָך׃
Ezek 28:6 בְכֵין כִדנָן אֲמַר יוי אֲלֹהִים חֲלָף דְחַשֵיבתָא בְלִיבָך דְאַת דַחלָא׃
Ezek 28:7 בְכֵין הָא אֲנָא מֵיתֵי עֲלָך נוּכרָאִין תַקִיפֵי עַמְמַיָא וְיִשלְפוּ סֵיפֵיהוֹן עַל תִיקוּן חוּכמְתָך וִיחַבְלוּן זִיו אֵימְתָך׃
Ezek 28:8 לְחַבָלָא יָחֲתוּנָך וֻתמוּת מְמָת מְטָעֲנֵי חֲרַב בְגוֹ יַמָמַיָא׃
Ezek 28:9 הֲמֵימַר תֵימַר דַחלָא אֲנָא קְֹדָם קָטְלָך וְאַת אֲנָשָא וְלֵית בָך צְרוֹך בְיַד מְחַבְלָך׃
Ezek 28:10 מְמָת רַשִיעִין תְמוּת בְיַד נֻכרָאֵין אֲרֵי אְנָא גְזַרִית בְמֵימְרִי אֲמַר יוי אֲלֹהִים׃
Ezek 28:11 וַהֲוָה פִתגָם נְבוּאָה מִן קְֹדָם יוי עִמִי לְמֵימַר׃
Ezek 28:12 בַר אָדָם טוֹל אִליָא עַל מַלכָא דְצוֹר וְתֵימַר לֵיה כִדנָן אֲמַר יוי אֲלֹהִים אַת דָמֵי לְמָנָא דְצוּרְתָא דִמתֻקַן בְחָכמְתָא וֻמשֻכלַל בְשוּפרֵיה׃
Ezek 28:13 בִסגֵי טוּב וְתַפנוּקִין אַת מִתפַנַק כְאִילוּ בְעֵדַן גִינְתָא דַיוי אַת שְרֵי עוּתרָא גֵיוְתָא וִיקָרָא מִתיְהֵיב לָך כָל אַבנִין טָבָן מְסַדְרָן עַל לְבוּשָך סָמְקָן יָרְקָן וְסַבהֲלוֹם כְרוּם יַמָא בוּרלָא וֻפַנתֵרִין שַבזֵיז אִזמַרַגדִין וֻבָרְקָן מֻשקְעָן בִדהַב כָל אִלֵין עֲבִידַת תִקוּנָך בְכֵין״בְרַם#3#״ רְאֵים לִבָך בְרַם לָא אִסתַכַלתָא בְפִגרָך \דְאַת עָבֵיד ״איתעביד#3#״ חֲלָלִין וְנִקבִין דְאִינוּן צוּרכַך דְלָא אִפשָר לָך דְתִתַקיַים בְלָא בְהוֹן מִיוֹמָא דְאִתבְרִיתָא עִמָך מְתֻקְנִין׃
Ezek 28:14 אַת מַלַך מְרֻבָא למַלכוּ וִיהַבִית לָך רְבוּתָא וְאַת עַל טוּר קוּדשָא דַיוי בַסַרתָא וֻבעַמָא קַדִישָא סַבַרתָא לְמִשלַט׃
Ezek 28:15 שְלִים אַת בְאוֹרחָתָך מִיוֹמָא דְאִתבְרִיתָא עַד דְאִשתְכַח שְקַר בָך׃
Ezek 28:16 בִסגִיאוּת סְחוֹרְתָך אִתמְלִיאוּ אוֹצְרָך חֲטוֹף וְחַבתָא וְאַפְסִינָך עַל דְבַסַרתָא עַל טוּר קֻדשָא דַיוי וְאַבְדִינָך מַלכָא רַרבְתָנָא״דרבתנא#3#״ עַל דְסַבַרתָא לְמִשלַט בְעַמָא קַדִישָא׃
Ezek 28:17 רְאֵים לִבָך בְתוּקפָך אִתחַבַלַת חָכמְתָך עַל זִיו אֵימְתָך עַל אַרעָא רַטַשתָך אַזהָרָא לְמַלכַיָא יְהַבתָך לְאִסתַכָלָא בָך׃
Ezek 28:18 מִסְגֵי חוֹבָך בִשקַר סְחוֹרְתָך אַפֵיסתָא מַקדְשָך וְאַיתִי עַמְמַיָא דְתַקִיפִין כְאִישָתָא מֵחוֹבֵי זְדוֹנָך אִנוּן יְשֵיצוֹנָך וְאַתְנִינָך כִקטַם עַל אַרעָא לְעֵינֵי כָל חָזָך׃
Ezek 28:19 כָל יָדְעַך בְעַמְמַיָא צַדִיאוּ עֲלָך כִד לָא הֲוֵית אַתְנִינָך וְכֵין תְהֵי עַד עָלְמָא׃
Ezek 28:20 וַהֲוָה פִתגָם נְבוּאָה מִן קְֹדָם יוי עִמִי״עלי#3#״ לְמֵימַר׃
Ezek 28:21 בַר אָדָם קַבֵיל נְבוּאָה עַל צִידוֹן וְאִתנַבִי עֲלַה׃
Ezek 28:22 וְתֵימַר כִדנָן אֲמַר יוי אֲלֹהִים הָאֲנָא שָלַח רוּגזִי עֲלַך צִידוֹן וְאַתיַקַר בְגַוִיך וְיִדְעוּן אֲרֵי אֲנָא יוי כַד אַעֲבֵיד בַה פוֹרעָנוּת דִינִין וְאַתקַדַש בַה׃
Ezek 28:23 וְאַשלַח בַה מוֹתָא וְקַטלָא בְשוּקַהָא כַד יִתרְמוֹן קְטִילִין בְגַוַה בְאֵיתָיוּתִי עֲלַה דְקָטְלִין בְחַרבָא מִסְחוֹר סְחוֹר וְיִדְעוּן אֲרֵי אֲנָא יוי׃
Ezek 28:24 וְלָא יְהֵי עוֹד לְבֵית יִשרָאֵל מַלַך מַבאִיש וְשִלטוֹן מָעִיק מִכָל סַחרָנֵיהוֹן דְבָזְזִין יָתְהוֹן וְיִדְעוּן אֲרֵי אֲנָא יוי אֲלֹהִים׃
Ezek 28:25 כִדנָן אֲמַר יוי אֲלֹהִים כַד אֲכַנֵיש יָת בֵית״בני#3#״ יִשרָאֵל מִבֵינֵי עַמְמַיָא דְאִתבַדַרוּ בְהוֹן״לתמן#3#״ וְאַתקַדַש בְהוֹן לְעֵינֵי עַמְמַיָא וְיִתְבוּן עַל״כל#3#״ אַרעָהוֹן דִיהַבִית לְעַבדִי לְיַעֲקֹב׃
Ezek 28:26 וְיִתְבוּן עֲלַה לְרוּחצָן וְיִבנוֹן בָתִין וְיִצְבוּן כַרמִין וְיִתְבוּן לְרֻחצָן כַד אַעֲבֵיד פוֹרעָנוּת דִינִין מִכָל דְבָזְזִין יָתְהוֹן מִסַחרְנֵיהוֹן וְיִדְעוּן אֲרֵי אֲנָא יוי אֲלָהֲהוֹן׃