2Sam 12:1 וֻשלַח יְיָ יָת נָתָן \לְוָת דָוִיד ״לדוד#3#״ וַאְתָא לְוָתֵיה וַאְמַר לֵיה תְרֵין גֻברִין הְווֹ בְקַרתָא חְדָא חַד עַתִירָא וְחַד מִסכֵינָא׃
2Sam 12:2 לְעַתִירָא הְווֹ עָן וְתוֹרִין סַגִי לַחדָא׃
2Sam 12:3 וֻלמִסכֵינָא לֵית כָל מִדָעַם אְלָהֵין אִמַרתָא חְדָא זְעֵירָא דְזַבנָה וְקַיְמַה וֻרבָת עִמֵיה וְעִם בְנוֹהִי כַחדָא מִפִתֵיה אָכְלָא וֻמִכָסֵיה שָתיָא וֻבחַנֵיה״וֻבחֵיקֵיה#3#״ שָכְבָא וַהְוָת לֵיה כִברַתָא׃
2Sam 12:4 וַאְתָא אֹרְחָא לְגֻברָא עַתִירָא וְחָס לְמִסַב מֵעָנֵיה וֻמִתוֹרֵיה לְמַעְבַד לְאֹרְחָא דַאְתָא לֵיה וֻנסֵיב יָת אִמַרתָא דְגֻברָא מִסכֵינָא וְעַבדַה לְגֻברָא דַאְתָא לְוָתֵיה׃
2Sam 12:5 וֻתקֵיף רֻגזָא דְדָוִיד בְגֻברָא לַחדָא וַאְמַר לְנָתָן קַיָים הוּא יְיָ אְרֵי גְבַר חַיָיב קְטוֹל גֻברָא דְעַבדַה לְהָדָא׃
2Sam 12:6 וְיָת אִמַרתָא יְשַלֵים עַל חַד אַרבְעָא חְלָף דַעְבַד יָת פִתגָמָא הָדֵין וְעַל דְלָא חָס׃
2Sam 12:7 וַאְמַר נָתָן לְדָוִיד אַת גֻברָא כִדנָן אְמַר יְיָ אְלָהָא דְיִשׂרָאֵל אְנָא מְשַחתָך לְמִהוֵי מַלכָא עַל יִשׂרָאֵל וַאְנָא שֵיזֵיבתָך מִידָא דְשָאוּל׃
2Sam 12:8 וִיהַבִית לָך יָת בֵית רִבוֹנָך וְיָת נְשֵי רִבוֹנָך בְחַנָך״בחובך בעובך בעטפך#3#״ וִיהַבִית לָך יָת בֵית יִשׂרָאֵל וִיהוּדָה וְאִם זְעֵיר וְאוֹסֵיף לָך כְאִלֵין וֻכאִלֵין׃
2Sam 12:9 מָדֵין בַסַרתָא עַל״ית#3#״ פִתגָמָא דַיְיָ״הָדֵין#3#״ לְמַעְבַד דְבִיש קְֹדָמַי יָת אוּרִיָה חִתָאָה קְטַלתָא בְחַרבָא וְיָת אִתְתֵיה נְסֵיבתָא לָך לְאִתוּ וְיָתֵיה קְטַלתָא בְחַרבָא דִבנֵי עַמוֹן׃
2Sam 12:10 וֻכעַן לָא תִפסוֹק״תִעדֵי#3#״ חַרבָא \מִן אְנָש בֵיתָך ״מִבֵיתָך#3#״ עַד עָלְמָא חְלָף דַאְשֵיטתַנִי וֻנסֵיבת יָת אִתַת אוּרִיָה חִתָאָה לְמִהוֵי לָך לְאִתוּ׃
2Sam 12:11 כִדנָן אְמַר יְיָ הָאְנָא מְקִים עְלָך בִישָא מִבֵיתָך וְאַדבַר יָת נְשָך לְעֵינָך וְאַתֵין לְחַברָך וְיִשכוֹב עִם נְשָך לְעֵינֵי שִמשָא הָדָא׃
2Sam 12:12 ​אְרֵי אַת עְבַדתָא בְסִתרָא וַאְנָא אַעְבֵיד יָת פִתגָמָא הָדֵין קְֹדָם כָל יִשׂרָאֵל וֻקדָם״וְקַבֵיל#3#״ שִמשָא׃
2Sam 12:13 וַאְמַר דָוִיד לְנָתָן חַבִית קְֹדָם יְיָ וַאְמַר נָתָן לְדָוִיד אַף יְיָ אַעבַר חוֹבָך לָא תְמוּת׃
2Sam 12:14 בְרַם אְרֵי״אִם#3#״ מִפתָח פְתַחתָא פוּמָא דְסָנְאֵי״ית סנאי#3#״ עַמָא דַיְיָ בְפִתגָמָא הָדֵין אַף בְרָא דְאִתיְלֵיד לָך מְמָת יְמוּת׃
2Sam 12:15 וַאְזַל נָתָן לְבֵיתֵיה וֻתבַר יְיָ יָת רָביָא דִילֵידַת אִתַת אוּרִיָה לְדָוִיד וְאִטְעַן׃
2Sam 12:16 וֻבעָא דָוִיד רַחְמִין מִן קְֹדָם יְיָ עַל רָביָא וְצָם דָוִיד צוֹמָא וְעָל וֻבָת וֻשכֵיב עַל אַרעָא׃
2Sam 12:17 וְקָמוּ סָבֵי בֵיתֵיה עְלוֹהִי לְאָקָמוּתֵיה מִן אַרעָא וְלָא אְבָא וְלָא אְכַל עִמְהוֹן לַחמָא׃
2Sam 12:18 וַהְוָה בְיוֹמָא שְבִיעָאָה וֻמִית רָביָא וֻדחִילוּ עַבדֵי״אינשי#3#״ דָוִיד לְחַוָאָה לֵיה אְרֵי מִית רָביָא אְרֵי אְמַרוּ הָא כַד הְוָה רָביָא קַיָים מַלֵילנָא עִמֵיה וְלָא קַבֵיל מִנַנָא וְאֵיכְדֵין נֵימַר לֵיה מִית רָביָא וְיַעְבֵיד בִישָא׃
2Sam 12:19 וַחְזָא דָוִיד אְרֵי עַבדוֹהִי מְלַחְשִין וֻסבַר דָוִיד אְרֵי מִית רָביָא וַאְמַר דָוִיד לְעַבדוֹהִי מִית רָביָא וַאְמַרוּ מִית׃
2Sam 12:20 וְקָם דָוִיד מֵאַרעָא וֻמשָא״וֻמשַח#3#״ואסחי#3#״ וְשַף וְשַנִי כְסוּתֵיה וְעָל לְבֵית מַקדְשָא דַיְיָ וֻסגֵיד וַאְתָא לְבֵיתֵיה וֻשאֵיל וְשַוִיאוּ לֵיה לַחמָא וַאְכַל׃
2Sam 12:21 וַאְמַרוּ עַבדוֹהִי לֵיה מָא פִתגָמָא הָדֵין דַעְבַדתָא עַד דְרָביָא קַיָים צַמתָא וֻבכֵיתָא וְכַד מִית רָביָא קַמתָא וַאְכַלתָא לַחמָא׃
2Sam 12:22 וַאְמַר עַד דְרָביָא קַיָים צַמִית וֻבכִיתִי אְרֵי אְמַרִית מַן יָדַע דִלמָא יִתרַחַם עְלַי מִן קְדָם יְיָ וְיֵחֵי רָביָא׃
2Sam 12:23 וֻכעַן מִית לְמָא דְנָן״דֵין#3#״ אְנָא צָאֵים הְאִכוֹל לְאָתָבוּתֵיה עוֹד אְנָא אְזֵיל לְוָתֵיה וְהוּא לָא תָאֵיב לְוָתִי׃
2Sam 12:24 וְנַחֵים דָוִיד יָת בַת שַבַע אִתְתֵיה וְעָל לְוָתַה וֻשכֵיב עִמַה וִילֵידַת בַר וֻקרָת יָת שְמֵיה שְלֹמֹה וַיְיָ רָחֵים לֵיה׃
2Sam 12:25 וֻשלַח בְיַד נָתָן נְבִיָא וֻקרָא יָת שְמֵיה יְדִידיָה בַעְבוּר״בְדִיל#3#״ יְיָ׃
2Sam 12:26 וַאְגִיחַ קְרָבָא יוֹאָב בְרַבַת בְנֵי עַמוֹן וֻכבַש יָת \קִריַת מַלכוּתָא ״קרתא דמיא#3#״׃
2Sam 12:27 וֻשלַח יוֹאָב אִזגַדִין לְוָת דָוִיד וַאְמַר אְגַחִית בְרַבָה אַף כְבַשִית יָת קִריַת מַלכוּתָא׃
2Sam 12:28 וֻכעַן כְנוֹש יָת שְאָר עַמָא וֻשרִי עַל קַרתָא וְכַבשַה דִלמָא אַכבוֹש אְנָא יָת קַרתָא וְיִתקְרֵי שְמִי עְלַה׃
2Sam 12:29 וֻכנַש דָוִיד יָת כָל עַמָא וַאְזַל לְרַבָת וַאְגִיחַ קְרָבָא בַה וְכַבשַה׃
2Sam 12:30 וֻנסֵיב יָת כְלִילָא דְמַלכְהוֹן מֵעַל רֵישֵיה וֻמַתקָלַה כַכרָא דְדַהבָא וֻבֵיה אַבַן טָבָא וַהְוָה עַל רֵישָא דְדָוִיד וַעְדַי קַרתָא אַפֵיק סַגִי לַחדָא׃
2Sam 12:31 וְיָת עַמָא דְבַה אַפֵיק וֻמסַר יָתְהוֹן בִמסָרִין וֻבמוֹרְגֵי בַרזְלָא וֻבמִגזְרֵי בַרזְלָא וְגָרַר״וגדר#3#״ יָתְהוֹן בְשוּקַיָא וְכֵין יַעְבֵיד לְכֹל קִרוֵי בְנֵי עַמוֹן וְתָב דָוִיד וְכָל עַמָא לִירוּשלַם׃