1Sam 1:1 וַהְוָה גֻברָא חַד מֵרָמְתָא מִתַלמִידֵי נְבִיַיָא מִטוּרָא דְבֵית אַפרָיִם וֻשמֵיה אַלקָנָה בַר יְרוֹחָם בַר אְלִיהוּא בַר תֹחוּ בַר צוּף גֻברָא פָלֵיג חוּלָק בְקֻדשַיָא בְטוּרָא דְבֵית אַפרָיִם׃
1Sam 1:2 וְלֵיה תַרתֵין נְשִין שוּם חְדָא חַנָה וְשוּם תִניֵיתָא פְנִנָה וַהְווֹ לִפנִנָה בְנִין וֻלחַנָה לֵית בְנִין׃
1Sam 1:3 וְסָלֵיק גֻברָא הַהוּא מִקַרתֵיה מִזמָן מוֹעֵד לְמוֹעֵד לְמִסגַד וֻלדַבָחָא קֳדָם יְיָ צְבָאוֹת בְשִילוֹ וְתַמָן תְרֵין בְנֵי עֵלִי חָפנִי וֻפִנחָס מְשַמְשִין קֳדָם יְיָ׃
1Sam 1:4 וַהְוָה יוֹם מוֹעְדָא וְדַבַח אַלקָנָה וִיהַב לִפנִנָה אִתְתֵיה וֻלכָל בְנַהָא וֻבנָתַהָא חוּלָקִין׃
1Sam 1:5 וֻלחַנָה יְהַב חוּלָק חַד בֵחִיר אְרֵי יָת חַנָה רָחֵים וֻמִן קֳדָם יְיָ אִתמְנַע מִנַה וְלַד׃
1Sam 1:6 וֻמַצהְבָא לַה עָרְתַה״צרתה#3#״ אַף מַרגְזָא לַה בְדִיל לְאַקנָיוּתַה אְרֵי אִתמְנַע מִן קֳדָם יְיָ מִנַה וְלַד׃
1Sam 1:7 וְכֵין יַעְבֵיד״עביד#3#״ שְנָא בִשנָא בִזמַן מִסְקַה לְבֵית מַקדְשָא דַיְיָ כֵין מַרגְזָא לַה וֻבָכיָא וְלָא אָכְלָא״אכלת#3#״׃
1Sam 1:8 וַאְמַר לַה אַלקָנָה בַעלַה חַנָה לְמָא אַת בָכיָא וֻלמָא לָא אְכַלת״תיכלי#3#״ וֻלמָא בָאִיש \לִיך לִבִיך ״לליבך#3#״ הְלָא רְעוּתִי טָבָא לִיך מֵעַסרָא בְנִין׃
1Sam 1:9 וְקַמַת חַנָה בָתַר דַאְכַלַת בְשִילוֹ וֻבָתַר דִשתִיאוּ וְעֵלִי כָהְנָא יָתֵיב עַל כֻרסְיָא בִסטַר סִפָא דְהֵיכְלָא דַיְיָ׃
1Sam 1:10 וְהִיא מָרִירָא נְפַש וֻמצַלְיָא קֳדָם יְיָ וֻמִבכָא בָכיָא׃
1Sam 1:11 וְקַיֵימַת קְיָם וַאְמַרַת יְיָ צְבָאוֹת מִגלָא גְלֵי קֳדָמָך סִגוּף אַמתָך וְיֵיעוֹל דוּכרָנִי קֳדָמָך וְלָא תְרַחֵיק״תַרחֵיק#3#״ יָת אַמתָך וְתִתֵין לְאַמתָך בַר בְגוֹ בְנֵי אְנָשָא וְאַמסְרִנֵיה \דִיהֵי מְשַמֵיש ״דישמש#3#״ קֳדָם יְיָ כָל יוֹמֵי חַיוֹהִי וֻמַרוַת אְנָש לָא תְהֵי עְלוֹהִי׃
1Sam 1:12 וַהְוָה מִדְאַסגִיאַת לְצַלָאָה קֳדָם יְיָ וְעֵלִי מוֹרֵיך לַה עַד דְתִפסוּק׃
1Sam 1:13 וְחַנָה הִיא מְצַלְיָא״ממללא#3#״ בְלִבַה״על לבה#3#״ לְחוֹד סִפוָתַהָא נָיְדָן״נען#3#״ וְקָלַה לָא מִשתְמַע וְחַשבַה עֵלִי כְאִיתָא רָויָא׃
1Sam 1:14 וַאְמַר לַה עֵלִי עַד אִמַתִי אַת מִשתַטְיָא״מִשתַטיָא#3#״מִשתְטַיָא#3#״ הְלָא תְפִיגִין יָת חַמרִך מִנִיך׃
1Sam 1:15 וַאְתֵיבַת חַנָה וַאְמַרַת״וַאְמַרִית#3#״ לָא רִבוֹנִי אִתְתָא עָיְקַת רוּחַ אְנָא וַחְמַר חְדַת וְעַתִיק לָא שְתִיתִי״אשתיתי#3#״ וַאְמַרִית״וֻשפַכִית#3#״ עֻלבַן נַפשִי בִצלוֹ קֳדָם יְיָ׃
1Sam 1:16 לָא תַכלֵים יָת אַמתָך קֳדָם בַת רִשעָא אְרֵי מִסְגֵי אַקנָיוּתִי וְאַרגָזְוָתִי אוֹרֵיכִית בִצלוֹ עַד כְעַן׃
1Sam 1:17 וַאְתֵיב עֵלִי וַאְמַר אִיזִילִי לשלָם וַאְלָהָא דְיִשרָאֵל יִתֵין יָת בָעוּתִך דִבעֵית מִן קֳדָמוֹהִי׃
1Sam 1:18 וַאְמַרַת תַשכַח אַמתָך רַחְמִין בְעֵינָך״קדמך#3#״ וַאְזַלַת אִתְתָא לְאוֹרחַה וַאְכַלַת וְאַפִין בִישִין לָא הְווֹ לַה עוֹד׃
1Sam 1:19 וְאַקדִימוּ בְצַפרָא וֻסגִידוּ קֳדָם יְיָ וְתָבוּ וַאְתוֹ לְבֵיתְהוֹן לְרָמָתָא וִידַע אַלקָנָה יָת חַנָה אִתְתֵיה וְעָל דוּכרָנַה קֳדָם יְיָ׃
1Sam 1:20 וַהְוָה לִזמַן מִשלַם יוֹמַיָא וְעַדִיאַת חַנָה וִילֵידַת בַר וֻקרָת יָת שְמֵיה שְמוּאֵל אְרֵי אְמַרַת מִן קֳדָם יְיָ שְאֵלתֵיה׃
1Sam 1:21 וֻסלֵיק גֻברָא אַלקָנָה וְכָל אְנָש בֵיתֵיה לְדַבָחָא קֳדָם יְיָ יָת דֵיבַח מוֹעְדָא וֻלשַלָמָא״ולאשלמא#3#״ יָת נִדרֵיה׃
1Sam 1:22 וְחַנָה לָא סְלֵיקַת אְרֵי אְמַרַת לְבַעלַה עַד דְיִתחְסֵיל רָביָא וְאַיתֵינֵיה וְיִתחְזֵי״וְיִתַחזֵי#3#״ קֳדָם יְיָ וְיִתֵיב תַמָן עַד עָלְמָא׃
1Sam 1:23 וַאְמַר לַה אַלקָנָה בַעלַה עְבִידִי דְתָקֵין״כדתקין#3#״ בְעֵינַכִי אוֹרִיכִי עַד דְתַחסְלִין יָתֵיה יְקַיֵים יְיָ יָת פִתגָמוֹהִי וְאוֹרֵיכַת אִתְתָא וְאוֹנֵיקַת יָת בְרַה עַד דְחסַלַת יָתֵיה׃
1Sam 1:24 וְאַסֵקתֵיה עִמַה כַד חְסַלתֵיה בְתוֹרִין תְלָתָא וֻמכִילְתָא חְדָא דְקַמחָא וֻגרָב דַחְמַר וְאֵיתִיתֵיה לְבֵית מַקדְשָא דַיְיָ לְשִילוֹ וְרָביָא הְוָה יָנִיק׃
1Sam 1:25 וֻנכַסוּ״ונכיסו#3#״ יָת תוֹרָא וְאֵיתִיוּ״וְאַתיאוּ#3#״ יָת רָביָא לְוָת עֵלִי׃
1Sam 1:26 וַאְמַרַת בְבָעוּ רִבוֹנִי חַיֵי נַפשָך רִבוֹנִי אְנָא אִתְתָא דְאִתעַתַדַת עִמָך הָכָא לְצַלָאָה קֳדָם יְיָ׃
1Sam 1:27 עַל רָבְיָא הָדֵין צַלִיתִי וִיהַב יְיָ לִי יָת בָעוּתִי דִבעֵיתִי מִן קֳדָמוֹהִי׃
1Sam 1:28 וְאַף אְנָא מְסַרתֵיה דִיהֵי מְשַמֵיש קֳדָם יְיָ כָל יוֹמִין דְהוּא קַיָים יְשַמֵיש״הוא משמש#3#״ קֳדָם יְיָ וֻסגֵיד תַמָן קֳדָם יְיָ׃