The Temptation of Jesus
Luk 4:1  Iesus autem plenus Spiritu Sancto regressus est ab Iordane et agebatur in Spiritu in desertum
Luk 4:2  diebus quadraginta et temptabatur a diabolo et nihil manducavit in diebus illis et consummatis illis esuriit
Luk 4:3  dixit autem illi diabolus si Filius Dei es dic lapidi huic ut panis fiat
Luk 4:4  et respondit ad illum Iesus scriptum est quia non in pane solo vivet homo sed in omni verbo Dei
Luk 4:5  et duxit illum diabolus et ostendit illi omnia regna orbis terrae in momento temporis
Luk 4:6  et ait ei tibi dabo potestatem hanc universam et gloriam illorum quia mihi tradita sunt et cui volo do illa
Luk 4:7  tu ergo si adoraveris coram me erunt tua omnia
Luk 4:8  et respondens Iesus dixit illi scriptum est Dominum Deum tuum adorabis et illi soli servies
Luk 4:9  et duxit illum in Hierusalem et statuit eum supra pinnam templi et dixit illi si Filius Dei es mitte te hinc deorsum
Luk 4:10  scriptum est enim quod angelis suis mandabit de te ut conservent te
Luk 4:11  et quia in manibus tollent te ne forte offendas ad lapidem pedem tuum
Luk 4:12  et respondens Iesus ait illi dictum est non temptabis Dominum Deum tuum
Luk 4:13  et consummata omni temptatione diabolus recessit ab illo usque ad tempus
Jesus Begins His Ministry
Luk 4:14  et regressus est Iesus in virtute Spiritus in Galilaeam et fama exiit per universam regionem de illo
Luk 4:15  et ipse docebat in synagogis eorum et magnificabatur ab omnibus
Jesus Rejected at Nazareth
Luk 4:16  et venit Nazareth ubi erat nutritus et intravit secundum consuetudinem suam die sabbati in synagogam et surrexit legere
Luk 4:17  et traditus est illi liber prophetae Esaiae et ut revolvit librum invenit locum ubi scriptum erat
Luk 4:18  Spiritus Domini super me propter quod unxit me evangelizare pauperibus misit me
Luk 4:19  praedicare captivis remissionem et caecis visum dimittere confractos in remissionem praedicare annum Domini acceptum et diem retributionis
Luk 4:20  et cum plicuisset librum reddidit ministro et sedit et omnium in synagoga oculi erant intendentes in eum
Luk 4:21  coepit autem dicere ad illos quia hodie impleta est haec scriptura in auribus vestris
Luk 4:22  et omnes testimonium illi dabant et mirabantur in verbis gratiae quae procedebant de ore ipsius et dicebant nonne hic filius est Ioseph
Luk 4:23  et ait illis utique dicetis mihi hanc similitudinem medice cura te ipsum quanta audivimus facta in Capharnaum fac et hic in patria tua
Luk 4:24  ait autem amen dico vobis quia nemo propheta acceptus est in patria sua
Luk 4:25  in veritate dico vobis multae viduae erant in diebus Heliae in Israhel quando clusum est caelum annis tribus et mensibus sex cum facta est fames magna in omni terra
Luk 4:26  et ad nullam illarum missus est Helias nisi in Sareptha Sidoniae ad mulierem viduam
Luk 4:27  et multi leprosi erant in Israhel sub Heliseo propheta et nemo eorum mundatus est nisi Neman Syrus
Luk 4:28  et repleti sunt omnes in synagoga ira haec audientes
Luk 4:29  et surrexerunt et eiecerunt illum extra civitatem et duxerunt illum usque ad supercilium montis supra quem civitas illorum erat aedificata ut praecipitarent eum
Luk 4:30  ipse autem transiens per medium illorum ibat
Jesus Heals a Man with an Unclean Demon
Luk 4:31  et descendit in Capharnaum civitatem Galilaeae ibique docebat illos sabbatis
Luk 4:32  et stupebant in doctrina eius quia in potestate erat sermo ipsius
Luk 4:33  et in synagoga erat homo habens daemonium inmundum et exclamavit voce magna
Luk 4:34  dicens sine quid nobis et tibi Iesu Nazarene venisti perdere nos scio te qui sis Sanctus Dei
Luk 4:35  et increpavit illi Iesus dicens obmutesce et exi ab illo et cum proiecisset illum daemonium in medium exiit ab illo nihilque illum nocuit
Luk 4:36  et factus est pavor in omnibus et conloquebantur ad invicem dicentes quod est hoc verbum quia in potestate et virtute imperat inmundis spiritibus et exeunt
Luk 4:37  et divulgabatur fama de illo in omnem locum regionis
Jesus Heals Many
Luk 4:38  surgens autem de synagoga introivit in domum Simonis socrus autem Simonis tenebatur magnis febribus et rogaverunt illum pro ea
Luk 4:39  et stans super illam imperavit febri et dimisit illam et continuo surgens ministrabat illis
Luk 4:40  cum sol autem occidisset omnes qui habebant infirmos variis languoribus ducebant illos ad eum at ille singulis manus inponens curabat eos
Luk 4:41  exiebant autem etiam daemonia a multis clamantia et dicentia quia tu es Filius Dei et increpans non sinebat ea loqui quia sciebant ipsum esse Christum
Jesus Preaches in Synagogues
Luk 4:42  facta autem die egressus ibat in desertum locum et turbae requirebant eum et venerunt usque ad ipsum et detinebant illum ne discederet ab eis
Luk 4:43  quibus ille ait quia et aliis civitatibus oportet me evangelizare regnum Dei quia ideo missus sum
Luk 4:44  et erat praedicans in synagogis Galilaeae