Warning Visions
Amo 7:1  haec ostendit mihi Dominus Deus et ecce fictor lucustae in principio germinantium serotini imbris et ecce serotinus post tonsorem regis
Amo 7:2  et factum est cum consummasset comedere herbam terrae et dixi Domine Deus propitius esto obsecro quis suscitabit Iacob quia parvulus est
Amo 7:3  misertus est Dominus super hoc non erit dixit Dominus
Amo 7:4  haec ostendit mihi Dominus Deus et ecce vocabat iudicium ad ignem Dominus Deus et devoravit abyssum multam et comedit simul partem
Amo 7:5  et dixi Domine Deus quiesce obsecro quis suscitabit Iacob quia parvulus est
Amo 7:6  misertus est Dominus super hoc sed et istud non erit dixit Dominus Deus
Amo 7:7  haec ostendit mihi et ecce Dominus stans super murum litum et in manu eius trulla cementarii
Amo 7:8  et dixit Dominus ad me quid tu vides Amos et dixi trullam cementarii et dixit Dominus ecce ego ponam trullam in medio populi mei Israhel non adiciam ultra superinducere eum
Amo 7:9  et demolientur excelsa idoli et sanctificationes Israhel desolabuntur et consurgam super domum Hieroboam in gladio
Amos Accused
Amo 7:10  et misit Amasias sacerdos Bethel ad Hieroboam regem Israhel dicens rebellavit contra te Amos in medio domus Israhel non poterit terra sustinere universos sermones eius
Amo 7:11  haec enim dicit Amos in gladio morietur Hieroboam et Israhel captivus migrabit de terra sua
Amo 7:12  et dixit Amasias ad Amos qui vides gradere fuge in terram Iuda et comede ibi panem et ibi prophetabis
Amo 7:13  et in Bethel non adicies ultra ut prophetes quia sanctificatio regis est et domus regni est
Amo 7:14  et respondit Amos et dixit ad Amasiam non sum propheta et non sum filius prophetae sed armentarius ego sum vellicans sycomoros
Amo 7:15  et tulit me Dominus cum sequerer gregem et dixit ad me Dominus vade propheta ad populum meum Israhel
Amo 7:16  et nunc audi verbum Domini tu dicis non prophetabis super Israhel et non stillabis super domum idoli
Amo 7:17  propter hoc haec dicit Dominus uxor tua in civitate fornicabitur et filii tui et filiae tuae in gladio cadent et humus tua funiculo metietur et tu in terra polluta morieris et Israhel captivus migrabit de terra sua