Job 26:1 וַיַּעַן אִיֹּוב וַיֹּאמַר׃
Job 26:2 מֶה־עָזַרְתָּ לְלֹא־כֹחַ הֹושַׁעְתָּ זְרֹועַ לֹא־עֹז׃
Job 26:3 מַה־יָּעַצְתָּ לְלֹא חָכְמָה וְתוּשִׁיָּה לָרֹב הֹודָעְתָּ׃
Job 26:4 אֶת־מִי הִגַּדְתָּ מִלִּין וְנִשְׁמַת־מִי יָצְאָה מִמֶּךָּ׃
Job 26:5 הָרְפָאִים יְחֹולָלוּ מִתַּחַת מַיִם וְשֹׁכְנֵיהֶם׃
Job 26:6 עָרֹום שְׁאֹול נֶגְדֹּו וְאֵין כְּסוּת לָאֲבַדֹּון׃
Job 26:7 נֹטֶה צָפֹון עַל־תֹּהוּ תֹּלֶה אֶרֶץ עַל־בְּלִי־מָה׃
Job 26:8 צֹרֵר־מַיִם בְּעָבָיו וְלֹא־נִבְקַע עָןָן תַּחְתָּם׃
Job 26:9 מְאַחֵז פְּנֵי־כִסֵּה פַּרְשֵׁז עָלָיו עֲנָנֹו׃
Job 26:10 חֹק־חָג עַל־פְּנֵי־מָיִם עַד־תַּכְלִית אֹור עִם־חֹשֶׁךְ׃
Job 26:11 עַמּוּדֵי שָׁמַיִם יְרֹופָפוּ וְיִתְמְהוּ מִגַּעֲרָתֹו׃
Job 26:12 בְּכֹחֹו רָגַע הַיָּם [כ= וּבִתוּבְנָתֹו] [ק= וּבִתְבוּנָתֹו] מָחַץ רָהַב׃
Job 26:13 בְּרוּחֹו שָׁמַיִם שִׁפְרָה חֹלֲלָה* יָדֹו נָחָשׁ בָּרִיחַ׃
Job 26:14 הֶן־אֵלֶּה קְצֹות [כ= דַּרְכֹּו] [ק= דְּרָכָיו] וּמַה־שֵּׁמֶץ דָּבָר נִשְׁמַע־בֹּו וְרַעַם [כ= גְּבוּרָתֹו] [ק= גְּבוּרֹותָיו*] מִי יִתְבֹּוןָן׃ ס