Neh 10:1 (10:2) וְעַל הַחֲתוּמִים נְחֶמְיָה הַתִּרְשָׁתָא בֶּן־חֲכַלְיָה וְצִדְקִיָּה׃
Neh 10:2 (10:3) שְׂרָיָה עֲזַרְיָה יִרְמְיָה׃
Neh 10:3 (10:4) פַּשְׁחוּר אֲמַרְיָה מַלְכִּיָּה׃
Neh 10:4 (10:5) חַטּוּשׁ שְׁבַנְיָה מַלּוּךְ׃
Neh 10:5 (10:6) חָרִם מְרֵמֹות עֹבַדְיָה׃
Neh 10:6 (10:7) דָּנִיֵּאל גִּנְּתֹון בָּרוּךְ׃
Neh 10:7 (10:8) מְשֻׁלָּם אֲבִיָּה מִיָּמִן׃
Neh 10:8 (10:9) מַעַזְיָה בִלְגַּי שְׁמַעְיָה אֵלֶּה הַכֹּהֲנִים׃ ס
Neh 10:9 (10:10) וְהַלְוִיִּם וְיֵשׁוּעַ בֶּן־אֲזַנְיָה בִּנּוּי מִבְּנֵי חֵנָדָד קַדְמִיאֵל׃
Neh 10:10 (10:11) וַאֲחֵיהֶם שְׁבַנְיָה הֹודִיָּה קְלִיטָא פְּלָאיָה חָןָן׃
Neh 10:11 (10:12) מִיכָא רְחֹוב חֲשַׁבְיָה׃
Neh 10:12 (10:13) זַכּוּר שֵׁרֵבְיָה שְׁבַנְיָה׃
Neh 10:13 (10:14) הֹודִיָּה בָנִי בְּנִינוּ׃ ס
Neh 10:14 (10:15) רָאשֵׁי הָעָם פַּרְעֹשׁ פַּחַת מֹואָב עֵילָם זַתּוּא בָּנִי׃
Neh 10:15 (10:16) בֻּנִּי עַזְגָּד בֵּבָי׃
Neh 10:16 (10:17) אֲדֹנִיָּה בִגְוַי עָדִין׃
Neh 10:17 (10:18) אָטֵר חִזְקִיָּה עַזּוּר׃
Neh 10:18 (10:19) הֹודִיָּה חָשֻׁם בֵּצָי׃
Neh 10:19 (10:20) חָרִיף עֲנָתֹות [כ= נֹובָי] [ק= נֵיבָי]׃
Neh 10:20 (10:21) מַגְפִּיעָשׁ מְשֻׁלָּם חֵזִיר׃
Neh 10:21 (10:22) מְשֵׁיזַבְאֵל צָדֹוק יַדּוּעַ׃
Neh 10:22 (10:23) פְּלַטְיָה חָןָן עֲנָיָה׃
Neh 10:23 (10:24) הֹושֵׁעַ חֲנַנְיָה חַשּׁוּב׃
Neh 10:24 (10:25) הַלֹּוחֵשׁ פִּלְחָא שֹׁובֵק׃
Neh 10:25 (10:26) רְחוּם חֲשַׁבְנָה מַעֲשֵׂיָה׃
Neh 10:26 (10:27) וַאֲחִיָּה חָןָן עָןָן׃
Neh 10:27 (10:28) מַלּוּךְ חָרִם בַּעֲנָה׃
Neh 10:28 (10:29) וּשְׁאָר הָעָם הַכֹּהֲנִים הַלְוִיִּם הַשֹּׁועֲרִים הַמְשֹׁרְרִים הַנְּתִינִים וְכָל־הַנִּבְדָּל מֵעַמֵּי הָאֲרָצֹות אֶל־תֹּורַת הָאֱלֹהִים נְשֵׁיהֶם בְּנֵיהֶם וּבְנֹתֵיהֶם כֹּל יֹודֵעַ מֵבִין׃
Neh 10:29 (10:30) מַחֲזִיקִים עַל־אֲחֵיהֶם אַדִּירֵיהֶם וּבָאִים בְּאָלָה וּבִשְׁבוּעָה לָלֶכֶת בְּתֹורַת הָאֱלֹהִים אֲשֶׁר נִתְּנָה בְּיַד מֹשֶׁה עֶבֶד־הָאֱלֹהִים וְלִשְׁמֹור וְלַעֲשֹׂות אֶת־כָּל־מִצְוֹת יְהוָה אֲדֹנֵינוּ וּמִשְׁפָּטָיו וְחֻקָּיו׃
Neh 10:30 (10:31) וַאֲשֶׁר לֹא־נִתֵּן בְּנֹתֵינוּ לְעַמֵּי הָאָרֶץ וְאֶת־בְּנֹתֵיהֶם לֹא נִקַּח לְבָנֵינוּ׃
Neh 10:31 (10:32) וְעַמֵּי הָאָרֶץ הַמְבִיאִים אֶת־הַמַּקָּחֹות וְכָל־שֶׁבֶר בְּיֹום הַשַּׁבָּת לִמְכֹּור לֹא־נִקַּח מֵהֶם בַּשַּׁבָּת וּבְיֹום קֹדֶשׁ וְנִטֹּשׁ אֶת־הַשָּׁנָה הַשְּׁבִיעִית וּמַשָּׁא כָל־יָד׃
Neh 10:32 (10:33) וְהֶעֱמַדְנוּ עָלֵינוּ מִצְוֹת לָתֵת עָלֵינוּ שְׁלִשִׁית הַשֶּׁקֶל בַּשָּׁנָה לַעֲבֹדַת בֵּית אֱלֹהֵינוּ׃
Neh 10:33 (10:34) לְלֶחֶם הַמַּעֲרֶכֶת וּמִנְחַת הַתָּמִיד וּלְעֹולַת הַתָּמִיד הַשַּׁבָּתֹות הֶחֳדָשִׁים לַמֹּועֲדִים וְלַקֳּדָשִׁים וְלַחַטָּאֹות לְכַפֵּר עַל־יִשְׂרָאֵל וְכֹל מְלֶאכֶת בֵּית־אֱלֹהֵינוּ׃ ס
Neh 10:34 (10:35) וְהַגֹּורָלֹות הִפַּלְנוּ עַל־קֻרְבַּן הָעֵצִים הַכֹּהֲנִים הַלְוִיִּם וְהָעָם לְהָבִיא לְבֵית אֱלֹהֵינוּ לְבֵית־אֲבֹתֵינוּ לְעִתִּים מְזֻמָּנִים שָׁנָה בְשָׁנָה לְבַעֵר עַל־מִזְבַּח יְהוָה אֱלֹהֵינוּ כַּכָּתוּב בַּתֹּורָה׃
Neh 10:35 (10:36) וּלְהָבִיא אֶת־בִּכּוּרֵי אַדְמָתֵנוּ וּבִכּוּרֵי כָּל־פְּרִי כָל־עֵץ שָׁנָה בְשָׁנָה לְבֵית יְהוָה׃
Neh 10:36 (10:37) וְאֶת־בְּכֹרֹות בָּנֵינוּ וּבְהֶמְתֵּינוּ כַּכָּתוּב בַּתֹּורָה וְאֶת־בְּכֹורֵי בְקָרֵינוּ וְצֹאנֵינוּ לְהָבִיא לְבֵית אֱלֹהֵינוּ לַכֹּהֲנִים הַמְשָׁרְתִים בְּבֵית אֱלֹהֵינוּ׃
Neh 10:37 (10:38) וְאֶת־רֵאשִׁית עֲרִיסֹתֵינוּ וּתְרוּמֹתֵינוּ וּפְרִי כָל־עֵץ תִּירֹושׁ וְיִצְהָר נָבִיא לַכֹּהֲנִים אֶל־לִשְׁכֹות בֵּית־אֱלֹהֵינוּ וּמַעְשַׂר אַדְמָתֵנוּ לַלְוִיִּם וְהֵם הַלְוִיִּם הַמְעַשְּׂרִים בְּכֹל עָרֵי עֲבֹדָתֵנוּ׃
Neh 10:38 (10:39) וְהָיָה הַכֹּהֵן בֶּן־אַהֲרֹן עִם־הַלְוִיִּם בַּעְשֵׂר הַלְוִיִּם וְהַלְוִיִּם יַעֲלוּ אֶת־מַעֲשַׂר הַמַּעֲשֵׂר לְבֵית אֱלֹהֵינוּ אֶל־הַלְּשָׁכֹות לְבֵית הָאֹוצָר׃
Neh 10:39 (10:40) כִּי אֶל־הַלְּשָׁכֹות יָבִיאוּ בְנֵי־יִשְׂרָאֵל וּבְנֵי הַלֵּוִי אֶת־תְּרוּמַת הַדָּגָן הַתִּירֹושׁ וְהַיִּצְהָר וְשָׁם כְּלֵי הַמִּקְדָּשׁ וְהַכֹּהֲנִים הַמְשָׁרְתִים וְהַשֹּׁועֲרִים וְהַמְשֹׁרְרִים וְלֹא נַעֲזֹב אֶת־בֵּית אֱלֹהֵינוּ׃